Suoma guovžža dihtoearrebivdu boazodoalloguovllus nogai mannan lávvardaga. Sámeguovllus godde oktiibuot čieža guovžža. Anára gielddas godde guhtta guovžža ja Soađegilis ovtta.
Suoma bealde nogai guovžža dihtoearrebivdu boazodoalloguovllus mannan lávvardaga, golggotmánu 31. beaivvi. Oktiibuot báhče 24 guovžža goddekeahttá boazodoalloguovllu dihtoeriin, čállá Yle Sápmi.
Anáris godde guhtta guovžža, golbma njiŋŋálasa ja golbma varrása. Njiŋŋálas guovžžaid godde Čuájápottâs lahka Bártteha ja Gaskkamus Šáddevári lahkosiin Anárjávrri nuorttabealde. Varris guovžžaid godde fas Sävrisvääris lahka Bártteha, Puarisuáiváš lahkosis Čaarmâuáivááh meahcceguovllus ja Rájijovsseha nuorttabealde lahka Ruošša rájá. Soađegilis goddojuvvon guovža lei varris, ja dat goddui lahka Porttipahta dahkujávrri.
Boazodoalloguovllu nuorttabeale 75 guovžža dihtoearis godde oktiibuot 55 guovžža, nappo 20 báhce vel goddekeahttá. Sámegielddain Anár, Ohcejohka ja Soađegilli gullet guovžabivddus boazodoalloguovllu nuorttabeale guovžabivdoguvlui. Boazodoalloguovllu oarjjábeale 20 guovžža dihtoearis fas godde 16 guovžža ja njeallje báhce goddekeahttá. Oarjjábeale boazodoalloguvlui sámegielddain gullá Eanodat.
