Ráđđehus dieđihii ahte Davvi-Suopma rievddai rukses guovlun vuossárgga guovvamánu 8. beaivvi rájes. Kárášjoga gielda čilge rádjá lea gitta buohkaide, earret rádjajohttiide geat barget Kárášjogas ja sii fertejit iskkahuvvot juohke čihččet beaivvi nu mo ovddit háve go Suopma lei rukses koronadilis.
Kárášjoga gieldda direktevra Kurt Maurstad muitala dát rádjarasttildan gielddus gusto buohkaide, earret sii geat ásset Suoma (dahje Ruoŧa) bealde ja barget Kárášjogas.
– Dát dilli leamaš ovdal ge go Suopma lei rukses dilis. Bargit geat barget Kárášjogas fertejit juohke čihččet beaivvi testejuvvot testenstašuvnnas rájá alde ovdalgo besset Norgii, čilge gielddadirektevra Kurt Maurstad.
Dát njuolggadusat gustojit bargiide geat barget Norggas ja orrot Suomas (dahje Ruoŧas) ja jođašit dávjá gaskal ássanriikka ja Norgga – Kárášjoga gieldda:
– Covid- 19 láhkaásahusa §6b vuođul spiehkastit buot bargojođašeaddjit, geat orrot Suomas (dahje Ruoŧas) ja jođašit dávjá gaskal ássanriikka ja Norgga, sisaboahtinkarantenas bargoáiggis jus sii Norggas iskkahuvvojit SARS-CoV-2 unnimustá juohke čihččet beaivvi, dan dieđiha Kárášjoga gielda 09.02.2021 ruovttusiiddus.
Loga eambbo dáppe: Mátkkoštanrávarievdadusat riikkaide ja guovlluide Davviriikkain
