Suoma badjeolbmot čoahkkanedje Roavvenjárgii boazoparlameantta deaivvadeapmái. Čoahkkimis lohpidii Suoma ministtar boazoealáhussii eanet doarjagiid.
Suoma eanan- ja meahccedoalloministtar Antti Kurvinen galledii boazoparlameantta Roavvenjárggas ja doalai sáhkavuoru. Kurvinen dajai sártnis ahte boazoealáhussii leat boahtimin doarjagat oassin ráđđehusa fuolahussihkarvuođaplánas, nu dieđiha Yle Sápmi.
– Ráđđehus áigu doarjut buot biebmobuvttademiid Suomas sierra fuolahussihkarvuođapakeahtas. Dasa lea maiddái doarjja boazoealáhussii, celkkii son.
Sivva dasa deattuhii ministtar lea ahte máilmmedilli lea váikkuhan maiddái sakka boazodollui dan dihte go hattit leat gorgŋon sakka maŋemus áiggiid.
