Vattenfall lea plánen cegget stuora bieggaturbiidnapárkka Jiellevári ja Bodena suohkanii, Storlandet nammasaš báikái, muhto Bodena suohkan ii háliit bieggaturbiidnapárkka dohko.
Fitnodat áiggošii cegget 373 bieggaturbiinna Storlandet nammasaš báikái.
– Lea buorre vejolašvuohta bieggaturbiidnapárkkas dáppe, lea johtilis ja doaibmilis vuohki háhkat ođđa energiija ovdal 2030, dadjá Vattenfall bieggaturbiinnaid prošeaktaovdánahttinhoavda Daniel Gustafsson, preassadieđáhusa bakte.
Muhto Bodena suohkan dadjá ahte guovlu lea suddjejuvvon.
– Storlandet nammasaš báiki lea luonddureserváhtta, danin eat háliit dohko bieggaturbiidnapárkka. Jaskesvuohta, guovssahas ja luondu lea dagahan ahte eanet válljejit orrut dien guovllus.
Bodena suohkana sátnejođiheaddji Sead Maglic dadjá SVT Norrbottenii ahte ferte plánet bieggaturbiidnapárkka eará báikái.
Jiellevári suohkan, gosa guovlu maid gullá, ii leat vel cealkán sin oaivila. Báikkálaš olbmot ja guovllu čearut leat vuosttaldan plánáid.
