Elkem Salten fitnodaga plánat álggahit ruvkke Násávárrái Ránu suohkanii, oažžu vuostehágu. Árjjatluovi suohkana sátnejođiheaddji, Sosialdemokraterna Britta Flinkfeld, cealká ahte suohkana bealis sii eai hálit ruvkke dán várrái.
Kiinná eaiggáduvvon Elkem Salten fitnodat háliida álggahit ruvkke Násávárrái Ránu suohkanii. Dat lea Ruoŧa ja Norgga rádjeguovlu ja lea Árjjatluovi suohkana ránnjá.
Dat lea maid guovlu gos sullii 40 000 bohcco guhtot birrajagi sihke Ruoŧa beale čearuin ja Sáltoduoddara orohagas. Fargga meannuda Norgga Ealáhus- ja guolástandepartemeanta Násávári boahtteáiggi. Muhto dál cealká Árjjatluovi suohkana sátnejođiheaddji, Sosialdemokraterna Britta Flinkfeld, ahte suohkana bealis sii eai hálit ruvkke.
– Dat mearrádusvuođđu man fitnodat lea ovdanbuktán ja čujuha, mas čájehit birasváikkuhusaid mii suohkana bealis čuoččuhit ahte fitnodat ii lea čoavdán váttisvuođa guovllu boazodoaluin. Mii eat doarjjo de ruvkeásaheami dan vuođul. Jus buktet buoret vuođu, de mii sáhttit iskat dan fas, dadjá Árjjatluovi sátnejođiheaddji Britta Flinkfeldt, SVT Norrbottenii.
