Guovdageainnu suohkan dieđiha ahte vuojadanhálla hárjehallanáiggit eai juolluduvvo nu movt almmuhuvvon, suohkan álggaha álbmotvuojádeami.
– Lea leamaš stuora beroštupmi vuojadandiimmuide ja suohkan lea ožžon olu ohcamiid fitnodagain ja organisašuvnnain. Dat čájeha ahte lea stuora beroštupmi vuojadanfálaldahkii Guovdageainnu álbmogis, čállá Guovdageainnu suohkan ruovttosiiddus.
Doarjagiin huksejuvvon
Vuojadanhálla lea huksejuvvon falástallan ja fysalaš aktivitehta rusttegiid doarjagiin (tippemidler). Doarjaga mearrádusat lohket ahte falástallanrusttet galgá addit álbmogii vejolašvuođa fysalaš aktivitehta doaimmahit ja jus gávnnahuvvo ahte doaimmahuvvo dahje adno mearrádusaid vuostá, de šaddá suohkan máksit doarjaga ruovttoluotta.
Sihkkarastit sihkarvuođa
Guovdageainnu suohkan, rustteteaiggádin, lea geatnegahtton sihkkarastit ahte lea dohkálaš sihkarvuohta rusttegis go lea anus, earret eará ahte lea vuojadanvákta geas lea heaggagádjunkursa.
– Dat leat mielddisbuktán ahte suohkan lea ferten ođđasit árvvoštallat almmuhuvvon hárjehallanáiggiid Guovdageainnu skuvlla vuojadanhállas.
Álggahit dušše álbmotvuojadeami
Vai sihkkarastet suohkana geatnegasvuođa sihkarvuođa ektui ja vai suohkan čuovvu mearrádusaid juolluduvvon doarjaga vuojadanhálla huksemii, maiddai vai buot Guovdageainnu ássit galget oažžut buori vuojadanfálaldaga, de lea suohkan mearridan álggahit dušše álbmotvuojadeami ovdalii go juolludit eaŋkil vuojadandiimmuid eaŋkil fitnodagaide dahje organisašuvnnaide.
– Dan mearrádusa vuođul eai fállojuvvo ovttage fitnodahkii dahje organisašuvdnii hárjehallanáiggit vuojadanhállas nu movt lei almmuhuvvon. Suohkan álggaha álbmotvuojadanfálaldaga nu jođánit go praktihkalaččat vejolaš, čállá suohkan.
