Dan dahket dan dihte go lea 750 jagi áigi go Norgga vuosttaš láhka ásahuvvui. – Mis lea guhkes ja rámálmas láhkahistorjá dáppe min riikkas. Dan mii háliidit ávvudit Stuorradikkis, dadjá Stuorradikki presideanta Masud Gharahkhani.
Stuorradiggi rahpá uvssaid olbmuide guovvamánu 2. beaivvi diibmu 17.00–21.00. Buohkat leat bures boahtimat.
Stuorradikki ruovttosiiddus daddjo ahte prográmmas sáhttá juohkehaš gávdnat juoidá mii lea somá ja miellagiddevaš sutnje.
Buohkat geat háliidit oaidnit Stuorradikki lanjaid galget dien beaivvi čađahit maiddái sihkarvuođadárkkisteami boađáhagas.
– Stuorradiggi lea álbmotviessu, ja rievtti mielde sávašeimmet ahte uvssat livčče rahpasat álbmogii juohke beaivvi. Dađi bahábut dat ii leat nu. Danin lea mearihis somá rahpat uvssaid erenoamáš dáhpáhusaid oktavuođas, lohká stuorradiggepresideanta.
Ovdavázzi
– Mii sávvat álbmot bearjadateahkeda ávvuda gelddolaš oasi Norgga historjjás. Norggas mii čállit «Vuođđoláhka» stuorra álgobustávain ja ávvudit vuođđoláhkabeaivvi nationálabeaivin. Norggas lea measta boarráseamos vuođđoláhka mii lea ain anus. Jagis 1274 ásahii Gonagas Magnus dan vuosttaš riikkaviidosaš lága mii lei ánus.
Riikaláhka lea leamaš anus badjel 400 jagi. Dat lei vuođđun servodahkii gos váldet vára sis geain ii leat buorre dilli.
