-Almmuhus-
-Almmuhus-
OĐĐASAT Stuora-Británnia šluhtte buot juovla­mátkkiid Davvi-Supmii 

Stuora-Británnia šluhtte buot juovla­mátkkiid Davvi-Supmii 

-

-

Stuora-Británnias mátkkoštanfitnodat dieđiha ahte šluhtte buot chartermátkkiid Davvi-Supmii dáid juovllaid. Muhto Davvi-Ruŧŧii bohtet 2000 olgoriikka turistta Belgias, mii lea dat riika máilmmis gos lea eanemus koronajápmin ássiid ektui.

Dábálaččat lávejit 700 chartergirdi seaivut Davvi-Supmii turisttaiguin geat galledit juovlastálu ja Davvi-Suoma juovlaáiggi. Muhto dál lea TUI mátkkoštanfitnodat Stuora-Britannias mearridan ahte šluhtte buot mátkkiid Davvi-Supmii. 

– Mii leat mearridan ahte šluhttet buot mátkkiid Davvi-Supmii Lapplándii daid juovllaid dađibahábut. Dat lei váivves mearrádus, muhto lea eahpesihkkaris dili ja koronapandemiija dihte čállá TUI mátkkoštanfitnodat Stuora-Británnias iežaset neahttasiiddus. 

Juovlaturisma

Stuora-Británnias mátkkoštanfitnodat TUI čállá ahte lea earenomáš dáhpáhus galledit juovlastálu, ja sii leat bargan garrasit lágidit sihkkaris mátkkiid Davvi-Supmii.

– Muhto dál leat mearridan ahte ii mana lágidit sihkkaris mátkkiid Supmii ja Suoma stáda garra njuolggadusaid dihte mii šluhttet buot mátkkiid. Mii vuoruhit dearvvašvuođa ja sihkarvuođa dál min kundariidda ja bargiide čállá fitnodat. 

Suopma lea mearridan ahte turisttat geat bohtet riikkain gos leat eanet go 25 njoammuma juohke 100.000 ássi nammii eai beasa Supmii ja dat njuolggadusat bistet gitta juovlamánu 13. beaivvi rádjái. 

Váikkuha buot fitnodagaide

Enontekiö sanomat aviisa čállá ahte dat váikkuha garrasit turismabargiide ja smávit turismafitnodagaide. Ealáhusas doivot ahte sullii duháha bargi masset dietnasa dan dilis go eai boađe charterturisttat. Suoma stuorimus mátkkoštanfitnodat North European Invest Oy mii eaiggáda Laplands Hotel, Lapland Safaris ja Lapland Resort váikkuhuvvojit. Čierastanbáikkit bohtet leat rahpasat dego dábálaččat muhto liigebargit eai boađe virgáduvvot.

– Sullii 350 bargi masset barggu ja sullii duháha liigebargi šaddet barggu haga dán dilis, dieđiha North European Invest Oy Enontekiö sanomat aviisii ja dat šaddet stuora ekonomalaš váikkuhusat. 

OLU OLGORIIKATURISTTAT HÁLIIDIT galledit juovlastálu juovllaid áiggi. Govva. Håkon Mosvold Larsen / NTB
OLU OLGORIIKATURISTTAT HÁLIIDIT galledit juovlastálu juovllaid áiggi. Govva. Håkon Mosvold Larsen / NTB

Charterturisma

Charterturisma lea lassánan maŋemus jagiid ja Eanodaga girdišilljui leat maŋemus jagiid dušše chartergirdit seivon.

– Ovddit áigodat manai bures Suoma stáda eastadanbijuid dihte, čilge ovdánahttindirektevra Hannu Autto Eanodaga gielddas. 

–  Muhto dál šaddet earenomáš juovllat Eanodagas go eai boađe charterturisttat dadjá Hannu Autto. Dat sáhttá garrasit váikkuhit ekonomalaččat go Eanodat lea turismaguovlu ja maid rádjeguovlu. Muhto pandemiija dilis lea nu ja dat leat dat mii mearrida čilge Autto. 

SMÁVVA GILÁŽII: Diehke Láttevárrái lahka Vuolle-Sohppara pláne dál «Explore the North» turistafitnodaga eaiggát buktit 2200 turistta Belgias gos lea olu koronanjoammun. Govva: Vuorkágovva Elin Marakatt
SMÁVVA GILÁŽII: Diehke Láttevárrái lahka Vuolle-Sohppara pláne dál «Explore the North» turistafitnodaga eaiggát buktit 2200 turistta Belgias gos lea olu koronanjoammun. Govva: Vuorkágovva Elin Marakatt

Davvi-Ruŧŧii bohtet turisttat

Davvi-Ruoŧas lea fas «Explore the North» turistafitnodat maid Johan Väisänen eaiggáda Norrbottenis. Son lea fas mearridan váldit vuostá 2000 olgoriika turistta Belgias, nu dieđiha SVT Norrbotten. Sus lea turismafitnodat sihke Látteváris Girona gielddas ja maid Tärändöas Bájila gielddas. 

– Sullii 2200 turistta bohtet 13 chartergirdiin Belgias 13. vahku. Sii girdet Gironii ja doppe bohtet bussiin diehke. Sis leat aktivitehtat dáppe nugo beanavuodjin ja skutersafári. Muhto turisttat eai deaivvat eará olbmuiguin servodagas, oaivvilda son. 

Massán sisaboađu

Son čilge ahte su fitnodat lea massán 70 proseantta buot sisaboađuin dán jagi. 

– Mis lea dieđusge ovddasvástádus dán koronaáiggis. Muhto mun dagan dan mu bargiid dihte vai sii eai masse barggu, čilge turistafitnodaga eaiggát Johan Väisänen SVT Norrbottenii

Belgias lea 560.000 olbmos dieđihuvvon korona ja 15.618 olbmo leat jápmán koronadávdii riikkas. Dat mearkkaša ahte Belgia lea dat riika máilmmis gos lea eanemus koronajápmin ássiid ektui dieđiha NTB.

Dálvi 2021

Eanodaga gieldda ovdánahttindirektevra Hannu Autto čilge ahte sii ráhkkanišgohtet dál boahtte dálvái ja sávvet ahte sáhttet váldit vuostá turisttaid fas. 

– Mii bargagoahtit dál goas mii sáhttit fas váldit vuostá olgoriikalaš turisttaid min guvlui fas, dadjá son. 

Stuora-Británnias mátkkoštanfitnotdat TUI čállá maid iežaset neahttasiiddus ahte sii maid ráhkkanišgohtet 2021 dálvái oažžut johtui charterturismma Davvi-Supmii. 

– Mii ipmirdit ahte mátkkit Davvi-Supmii leat earenomážat ja lea šállošahtti go ná šattai, muhto mátkkit Lapplándii álggahuvvojit fas 2021 dálvvi čállá fitnodat iežaset neahttasiidui. 

-Almmuhus-