-Almmuhus-
OĐĐASATStatoil pláne álggahit Johan Castberg-buvttadeami 2022:s

Statoil pláne álggahit Johan Castberg-buvttadeami 2022:s

-

-

Statoil áigu álgit bargat Johan Castberga oljoriggodagaiguin maid leat gávdnan Barentsábis, ja ráhkkanit álggahit doaimma viđa jagi geahčen.

Johan Castberg lea dat stuorámus oljogávdnamuš  Barentsábis dáid maŋimuš jagiid.

Leat sullii 450-650 miljovna fáhta olju, ja gártet 1700 jahkedoaimma, sullii 500 dain leat Davvi-Norggas.

Statoil rehkenastá ahte doaibmaháhkan máksá sullii 1,15 milliarda ruvnno jahkái, ja rehkenastet ahte šaddet geavahit sullii 50 miljárdda ruvnno huksemii.

 

Viiddis proseassa

Doaibmaorganisašuvdna galgá leat Háršttáin, muhto váráiduhttinstašuvnna ja helikopterstašuvnna ásahit Hámmárfestii.

– Lea leamašan viiddis proseassa gos leat veardidan olu iešguđetlágan molssaeavttuid, muhto Hámmárfeasta ja Háršttát leat čájehuvvon leamen dat buoremus industriála čovdosat Johan Castbergii, dadjá Johan Castberg prošeaktadirektevra, Knut Gjertsen.

 

Gievrudahttit Hámmárfeasta

Statoilas einnostit ahte sii ovttas eará operatevrrain isket mo sii sáhttet nannet «Ollislaš Petroleumbirrasa Hámmárfeasttas» ovdalgo ovdanbuktet ollislaš huksen- ja doaibmaplána.

– Ovddasguvlui nanne dát rekruterema Petroleum ealáhussii, ja Finnmárku maid oažžu gievrrabut posišuvnna dan teknologalaš jođihuvvon ovdánemis Barentsábis.

 

Árvvoštallet terminála hukset

Váikkuhusguorahallan čájeha ahte Statoil ovttas Castberg-doaibmaoasálaččain árvvoštallet hukset oljoterminála Rinjárgii Nordkáhpa gildii.

Dát lea čatnon oktii eará plánejuvvon huksemiidda Barentsábis.

Lágidanfierpmádat PetroArtic illuda go 500 ođđa jahkedoaimma leat plánejuvvon Davvi-Norgga oljosuorgái.

– Ođđa kapihttal Davvi-Norgga oljomáidnasis lea lahkoneamen, dadjá Petro Arctica direktevra Kjell Gievær.

-Almmuhus-