Stádaministtar galleda otne Davvi-Norgga buohcciviesu Romssas, rahpandihtii ođđa doaimmaid mat galget nannet dearvvašvuođafálaldaga, seammás go son maid galgá gullat veahá ambulánsagirdiášši birra.
Stádaministtar Erna Solberg boahtá otne, geassemánu vuosttaš beaivvi, Davvi-Norgga buohccivissui (UNN).
Earret eará boahtá stádaministtar rahpat ođđa A-gearddi ja PET-guovddáža buohcciviesus, mat galget leat mielde nannemis dearvvašvuođafálaldaga Davvi-Norgga ássiide.
Čilgejuvvo ambulánsagirdifálaldaga birra
Maiddái áigu stádaministtar gullat lagabui ambulánsagirdifálaldaga birra UNN bargiin ja njunnošiin.
– Lea áigeguovdilis ášši, ja danne jurddašeimmet ahte stádaministtar galgá oažžut seamma dieđuid áššiid birra go eará politihkkárat. Son oažžu goit veahá dieđuid áššis váikko čoahkkin leage oanehaš. Mis eai leat eará mihtut go ahte son galgá oažžut dieđuid fágaolbmuin, mat leat áššáigullevaččat, čilge UNN gulahallanhoavda Hilde Annie Pettersen iTromsø aviisii.
Boahtte vahkus áigu Stuorradiggi gieđahallat ambulánsagirdi boahtteáiggi dili.
