-Almmuhus-
-Almmuhus-
OĐĐASATGuovdageainnu báktehárji spaggadievva go olbmot fas viimmat besse ávvudit nationálabeaivvi

Guovdageainnu báktehárji spaggadievva go olbmot fas viimmat besse ávvudit nationálabeaivvi

-

-

Dán jagi besse olbmot fas ávvudit Norgga nationálabeaivvi gáržžidemiid haga. Disdaga lei Guovdageainnu Báktehárji spaggadievva go ávvudoalut lágiduvvojedje doppe.

Norggas lea miessemánu 17. beaivi stuora beaivi man ávvudit juohke jagi, muhto dán jagi soittii beaivvis vel stuorát mearkkašupmi go olbmot fas viimmat besse deavdit biilaluottaid ráidovázzimiin. Mánát, nuorat ja rávisolbmot čoahkkanedje disdaga Guovdageainnu dearvvašvuođaguovddážii, gos de vázziledje Báktehárjái ávvudoaluide.

Ráiddu mársenmusihkka gullui dassái go idjagozánis russat dearvvahedje ráiddu. Sii coahkkaledje ala iežaset mihtilmas šlápmamusihka. 

Guovdageainnu nuoraidskuvlla logát luohkká lágidedje doaluid Báktehárjjis. Luohkás ledje guokte oahppi geat sávaiga buohkaide bures boahtima. Suohkana várresátnejođiheaddji Isak Ole J. Hætta sártnui lávddis go sátnejođiheaddji lei buohccindieđihuvvon. Russat maid sárdno maŋŋel várresátnejođiheaddji, ja loahpas ledje sihke filmmat, dánsun ja musihkka guoimmuheapmin buohkaide. 

Geigejedje áŋgiruššanbálkkašumi

Suohkanis lea árbevierrun nationálabeaivvis geiget áŋgiruššanbálkkašumi ovtta olbmui gii lea čađahan namuhanveara eaktodáhtolaš bargguid. Várresátnejođiheaddji geigii dán jagáš áŋgiruššanbálkkašumi Inga J. Eirai, gii lea maŋimus logi jagi leamašan Guovdageainnu válaštallansearvvi stivrras. 

Eira lohká iežas searvan measta buot eaktodáhtolašbargguide maid searvi lea čađahan, ja ahte áidna mainna ii leat bargan lea rávisolbmočiekčamiin.

– Dát čájeha goit ahte suohkan lea oaidnán mu go lean juohke sajis leamašan, boagusta Eira, ovdalgo joatká:

OAČČUI BÁLKKAŠUMI: Inga J. Eira oaččui suohkanis 10 000 ruvdnosaš bálkkašumi go lea áŋgirit bargan eaktodáhtolaččat. Govva: Áslat Issát Eira
OAČČUI BÁLKKAŠUMI: Inga J. Eira oaččui suohkanis 10 000 ruvdnosaš bálkkašumi go lea áŋgirit bargan eaktodáhtolaččat. Govva: Áslat Issát Eira

– In mun gal bálkkašumiid ovddas bargga. Mu mielas lea hui dehálaš searvat eaktodáhtolašbargguide, go mii bargat mánáid ja nuoraid ovddas, lohká Eira. 

Maŋŋel go lea logi jagi čohkkán valáštallansearvvi stivrras, de lea Eira mearridan lávket eret ja váldit bottu. Son mieđiha ahte lea veaháš ártet, muhto goitge buorre váldit bottu.

– Gal de lean fas gievrrat go boađán ruovttoluotta, moddje Eira.

-Almmuhus-