Ruoŧa girku dieđiha ahte bivnnuhis sámi konfirmašuvdnaleaira ii lágiduvvo 2023:s.
Luleju girkoossodat lea lágidan juohke geasi sámi konfirmašuvdnaleairra gosa sullii 40-60 nuora lávejit čoahkkanit. Konfirmašuvdnaleaira láve bistit guokte vahku ja de nuorat váldet konfirmašuvnna Burträsk girkus.
Dál dieđiha lágideaddji ahte sii áigot ođasmahttit leairra. Danin leaira ii lágiduvvo boahtte geasi 2023.
– Sámi konfirmašuvdnaleaira lei hui deaŧalaš Luleju girkoossodahkii ja olles Ruoŧa girkui. Dađi bahábut eat sáhte lágidit leairra boahtte jagi. Mun ipmirdan ahte olu nuorat leat beahtahallan go leaira ii lágiduvvo, muhto mii fertet ođasmahttit leairra vai šaddá buorre sámi konfirmašuvdnaleaira, dadjá Eva-Maria Karlsson, Ruoŧa girku direktevra, preassadieđáhusas.
Virgádit ođđa bargi
Sámi konfirmašuvdnaleaira galgá ođasmahttojuvvot ja ovdánit. Dál Ruoŧa girku maiddái virgada ođđa bargi ođasmahttinprosessii, Nils-Johan Labba, gii lea ovdal bargan leairahoavdan.
– Mii dárbbašit vel gávdnat sámi jođiheddjiid ja leairahoavdda, ja lea deŧalas ahte sámit leat mielde ođasmahttinproseasssas, čilge Eva-Maria Karlsson, Ruoŧa girku direktevra, preassadieđáhusas.
Ruoŧa girku ja Luleju girkoossodat háliida fállát sámi nuoraide deaivvadanbáikki.
– Konfirmašuvdnaleairras besset leat majoritehtas ja ovttas iskat mot lea leahkit nuorra sápmelažžan ja risttalažžan, čilge Eva-Maria Karlsson.
