-Almmuhus-
-Almmuhus-
OĐĐASAT– Sámi giellastipeanda movttiidahttá 

– Sámi giellastipeanda movttiidahttá 

-

-

Golbma studeantta ožžo sámi giellastipeandda, mii galgá earret eará nannet oahpaheaddje­dili guovlluin gos sámegiella lea unnitlogus. 

Sámi allaskuvla Guovdageainnus jugii sámi giellastipeandda, Seminarii Lapponici Fond, golmma studentii guovvamánu 6. beaivvi. 

Seminarii Lapponici Fond ásahuvvui njukčamánu 24. beaivvi 1752:s ja stipeanda lea studeanttaide geain lea sámegiella oassin oahpaheaddjeoahpuin dahje lektor­oahpuin Sámi allaskuvllas, UiT Norgga árktalaš universitehtas ja Nord Universitehtas.

Dán háve ožžo stipeandda Malin Kristina Sandvik Wilks, Elle Helene N. Siri ja Stigo Holm. Stipeanda lea 15 000 ruvnno juohkehažžii. 

 

Mávssolaš olles Sápmái

Elle Helene N. Siri lea čállime masterdutkosa sámegiela didak­tihkas. Son lei hui movttet go oaččui dakkár stipeandda mii movttiidahttá olahit mastergráda, mii boahtá ávkin olles Sápmái. 

– Sámi oahpaheaddjeoahppu ii leat mávssolaš dušše munnje, muhto olles Sápmái. Jus sámi ­servodat galgá seailluhuvvot, de dárbbahuvvojit sámi oahpaheaddjit geain lea nana gelbbolaš­vuohta sámi árvvuin, perspektiivvas, bajásgeassimis ja pedagogihkas, dadjá son. 

Son guhte ohca stipeandda galgá čájehit árjjalaš servodatberoš­tumi, mas ovdamearkan lea oasálastin sámi dahje eamiálbmot organisašuvdna- dahje kultur­eallimis. 

– Siri lea ge earret eará bajáššaddan boazosámi bearrašis ja lea searvan aktiivvalaččat boazobarg­guin, son lea juoigan luohte­skearrus ja searvan politihkalaš doaimmaide, gesii allaskuvlalektor Mai Britt Utsi ovdan. 

 

Dárbbahuvvojit oahppan olbmot

Stigo Holm lea nuppi jagi mánáidgárdeoahpaheaddjeoahpus ja lea orron ja bargan Oslos earret eará sámi mánáidgárddis ja sámegiel­oahpaheaddjin.

Sus lea ge plána fas máhccat Osloi go geargá oahpuin, go su mielas lea dehálaš ahte guovlluin, gos ii leat nu ollu sámegiella, leat sámegielagat ­geain lea oahppu. 

 – Sámegiella lea rašes dilis ja dalle lea dehálaš bargat dainna ahte giella bissu, earenoamážit olggo­bealde guovddáš Sámis, oaivvilda Holm.

Stipeanddas lea ge maid ulbmilin nannet oahpaheaddjedili dain guovlluin gos sámegiella ja sámit leat unnitlogus, ja gos lea stuora dárbu oahpaheddjiide geain lea gelbbolašvuohta sámegielas.

Holm lohká ahte leat ollu gáibá­dusat oažžut dán stipeandda ja nu son atná ge dán rápmin alcces. 

– Lea duođai gudni ja rápmi dan oažžut, go leat ollu eavttut maid galgá deavdit. Diehttelasat dat movttiidahttá bargat sáme­gielain. 

Utsi muitalii maid ahte Holm lea searvan ollu servodatdoaimmain, earret eará lea Oslo sámi viesu stivrras leamaš ja Oslo ­Noereh searvvis aktiiva. 

Malin Kristina Sandvik Wilks ii lean Sámi allaskuvllas stipeanda­juohkimis.

-Almmuhus-