Gaskavahku almmuhii Mediebedriftens Landsforening aviisalohkkiid varas loguid. Sámi aviissat Ávvir ja Ságat doalahit iežaset lohkkiid ja vel lassánit.
Mediebedriftens Landsforening geahččá Norgga aviissaid deaddilanloguid ja lohkkiidloguid.
Aviisalogut čájehit ahte sámi aviissat doalahit iežaset lohkkiid ja lassánit vel. Diimmá ektui leat Ávviris lassánan lohkkit. Leat dal 68 eanet diŋgojeaddji go diibmá ja 1269 olbmo lohket dal beaivválaččat ođđasiid sámegillii.
Ávvira váldodoaimmaheaddji Kari Lisbeth Hermansen lea ilus.
– Mii leat hui ilus ja duhtavaččat go lea plussalohku 2. jahkebeali 2020 maid, vaikko ii leat stuora lohku. Go geahččat sihke vuosttaš ja nuppi jahkebeali 2020 loguid, de leat hui duđavaččat loguiguin. Dat muitala ahte mii nagodit doalahit lohkkiid. Mii deaivat iežamet áššiiguin lohkkiid beroštumiid ja dainna leat mii hui giitevaččat. Juste lohkkiid váste mii juohke beaivvi álggahitge ođđa návccaiguin dainna mihtuin ahte galgat fállat viiddis ja miellagiddevaš sisdoalu, lohká Ávvira váldodoaimmaheaddji Kari Lisbeth Hermansen.
Viiddes guovllu
Hermanssen čilge ahte Ávvira bargit dál gokčet stuora geográfalaš guovllu Sámis ja dat nanne maid sin doaimmahusa.
– Jáhkán maid dan go mii dál nagodit veaháš viidát guovllu gokčat lea maid nannen min buktagiid. Mis leat dál olbmot sihke Guovdageainnus, Kárášjogas, Deanus, Romssas, Álttás, ja vel bargi Oslos muhtun virgerproseanttas. Maŋemus jagi lea mis maid leamašan Ruoŧa beale Sámis, Gárasavvonis, okta bargi.
Koronajahki
Ávvira váldodoaimmaheaddji Kari Lisbeth Hermansen čilge ahte Ávvir doalaha lohkkiid ja rámida doaimmahusa.
– Mis leat čielga mihtut maid guvlui bargat ja háliidan ge rámidit min bargiid. Dat go nagodit doalahit lohkkiid lea min oktasaš barggu boađus. Juohke okta min doaimmahusas oažžu odne leat rámis go mii nagodit doalahit lohkkiid ja oažžut ođđa lohkkiid. Vaikko lea leamašan lossa jahki korona geažil, de nagodit beaivválaččat čuovvut ođasgova ja čoavdit hástalusaid mat čuožžilit koronagáržžidemiid geažil.
Aviisalogut
Oktiibuot leat ge 225 aviissa logut almmuhuvvojit, ja 191:s dain ovdánedje. Digitála e-aviisafálaldaga logut maid lassánit 12 % ja lea vuosttas geardde go eanet lohkkit válljejit digitála abonnemeantta ja ovdal go báberaviissa. Leat dál 1,2 miljovnna digitala abonneantta Norgga aviissain.
Guokte aviissa Romssas ja Finnmárkkus fas masset lohkkit ja dat leat Harstad Tidende ja Sør-Varanger Avis. Eanemus lassánit lohkkit Nordlysas 1091 lohkkiin, Finnmark Dagblad 342 lohkkiin, Kyst og Fjord 221 lohkkiin ja Finnmarken 220 lohkkiin.
Son lohká vel ahte lea somá oaidnit ahte nubbi sámi aviisa, Ságat aviisa, ovdána bures.
Ságat aviisa
Ságat aviisa lassána 59 lohkkiin. Ávvira váldodoaimmaheaddji Kari Lisbeth Hermansen mielas lea somá oaidnit go nubbi sámi aviisa ovdána bures.
Ságat váldodoaimmaheaddji Geir Wulff lea duhtavaš loguin.
– Mii leat hui duhtavaččat lassánemiin ja dat dagaha ahte mis dál lea deaddilanlohku 3024 maŋemus jahkebealis 2020. Leat dál olahan dan magihkalaš 3000 ráji! čilge Wulff.
Ságat aviissa doaimmaheaddji Geir Wulff čilge ahte báberaviisa lea sin doaimmahaga váldobuvtta, muhto lassáneapmi lea digitála buktagiin.
– Mii leat ilolaččat go nagodit doalahit iežamet báberaviisalohkkiid seammás go olahit ođđa lohkkiid digitála aviissa bakte. Leat maid ilolaččat go Ávvir doalaha ja lassánii vuosttas jahkebealis diibmá. Sámi aviissat leat hirbmat deaŧalaččat Sámi cealkinfriddjavuhtii ja demokratiijai. Sáhttá dadjat ahte mii leat sámi servodaga čohkkejeaddji go juohkit dieđuid sámi dilalašvuođa ja deaŧalaš sámipolitihkalaš áššiid birra sámi vuolggasajis, cealká Wulff.
