Ruoŧa sámeministtar Parisa Liljestrand čállá Ruoŧa Sámiid Riikasearvái ahte ii astta čoahkkinastit organisašuvnnain.
Lei golmma mánu áigi go Ruoŧa Sámiid Riikasearvi bivddii čoahkkima Ruoŧa kulturministariin Parisa Liljestrandain, geas lea ovddasvástádus sámi kultuvrii ja ealáhusaide. Ruoŧa Sámiid Riikasearvi háliidii ságastit deaŧalaš áššiid birra mat gusket sámeministarii. Dál ministtar lea vástidan ahte ii astta čoahkkinastit sámi ovddasteddjiiguin.
– Stáhtaráđđi dieđiha ahte ii astta deaivvadit minguin dán jagi. Son ii háliit loktet min gažaldagaid ja mii leimmet vuordán ahte son váldá áiggi deaivvadit minguin, dadjá Ruoŧa Sámiid Riikasearvvi jođiheaddji Matti Blind Berg.
Ruoŧa Sámiid Riikasearvvi jurista Jenny Wik Karlsson cealká ahte dálá ráđđehus ii vuorut deaivvadit sámi ovddasteddjiiguin.
– Leat olu deaŧalaš gažaldagat mat gusket čearuide, boazodollui ja sámeservviide maid mii háliidit loktet stáhtaráđđái. Lea heittot go ministtar ii vuorut deaivvadit minguin dego min gažaldagat eai leat doarvái miellagiddevaččat ja árvvolaččat, dadjá son preassadieđáhusa bakte.
