Sámediggeráđđi juolluda 300 000 ruvnno doarjaga Finnmárkku buohccivissui/SÁNAG:i. Doarjja galgá geavahuvvot heivehit kurssa iešsorbmeneastadeami birra «Áicil iešsorbmenjurdagiidda» sámi kontekstii.
Iešsorbmen lea duođalaš álbmotdearvvašvuođa- ja servodatváttisvuohta Sámis. Sámi našuvnnalaš gealboguovddáš – psyhkalaš dearvvasvuođasuddjen, SÁNAGis (Sámi klinihkas) lea erenoamáš ovddasvástádus eastadit iešsorbmema sámi guovlluin Norggas ja dasa lassin ovdánahttit kulturhearkkes eastadan doaimmaid.
Ulbmil prošeavttain lea eastadit iešsorbmema sámi guovlluin. Kurssaid bokte áigu lasihit álbmoga gelbbolašvuođa fuomášit go nubbi lea jurddašeamen iežas heakkahuhttit, ja oahpahit álbmogii maid galget dahkat go ohcalit dárbbašlaš dearvvašvuođaveahki.
– Sámedikki mielas lea dát prošeakta mas heivehit «Áicil iešsorbmenjurdagiidda», dehálaš ja dárbbašlaš bargun, ja dán doaimmas sáhttá leat stuorra mearkkašupmi sámi álbmogii, lohká sámediggeráđđelahttu Runar Myrnes Balto (NSR) preassadieđáhusas.
Eastadeami bargu
Sámedikki mielas lea dehálaš ahte iešsorbmen eastaduvvo, muhto váilot reaiddut maid sáhtášii geavahit eastadeami barggus. Heivehit «Áicil iešsorbmenjurdagiidda» kurssa lea maid juoga maid lea evttohan doaibman iešsorbmen eastadeami plánas sápmelaččaid gaskkas Norggas, Suomas ja Ruoŧas.
– Reaidu mii lea heivehuvvon sihke kultuvrra ja giela ektui, galggašii addit kursaoassálastiide buoret vásáhusa ja máhttu ja jáhkkimis sii ožžot das ávkki, lohká Myrnes Balto.
«Áicil iešsorbmenjurdagiidda» prošeakta
Dát prošeakta lea ovttasbargu gaskal SÁNÁG, RVTS Nord og Midt (mii lea davvi ja gaska guovllu resursaguovddáš veahkaválddi, traumáhtalaš hušša ja iešsorbmeneastadeapmi) ja buot dáid ásahusaid bargu lea eastadit iešsorbmema sámi guovlluin. Sii geat dovdet dán kurssa, lohket dán kurssa heivet hirbmat bures jorgaleapmái ja kultuvrra heiveheapmái.
300.000 kruvdnasaš doarjja vižžo doarjjaortnegis «Doarjja dearvvašvuođa-, fuolahus- ja mánáidsuodjalanprošeavttain mas vuoruhuvvo «prošeavttat mat leat mielde eastadeamen ja geahpedeamen iešsorbmema, iešsorbmengeahččalemiid ja iešroasmmehuhttimii».
Ražat go don dahje earát gean don dovddat iešsorbmenjurdagiiguin? Dáin ásahusain sáhtát oažžut veahki
Mental Helse Hjelpetelefonen: Telefuvdna 0047 116 123 (birra jándora), chat-bálvalus ja čállinbálvalus: sidetmedord.no (birra jándora)
Kirku SOS / Kirkens SOS: 22 40 00 40 (birra jándora) dahje chat www.soschat.no juohke beaivvi tiibmu 18.30-22.30 (bearjadaga gitta tiibmu 01.30)
SÁNÁG mánát ja nuorat: telefuvdna 0047 78 96 74 20
