Vihtta sámi dáiddára servet riikkaidgaskasaš dáiddačájáhussii «Documenta 14» Kasselis Duiskkas. – Čájáhus addá áidnalunddot vejolašvuođa gaskkustit sámi dáidaga riikkaidgaskasaččat, dadjá sámediggepresideanta Vibeke Larsen, gii searvá čájáhussii geassemánus.
– Dát lea stuorra ja historjjálaš dáhpáhus, dadjá sámediggepresideanta Vibeke Larsen Sámedikki pressedieđáhusas.
Son lea mannamin «Documenta 14» rahpamii mii lea Kasselis Duiskkas.
Čájáhus Documenta lágiduvvo juohke viđat jagi, ja 2017:s lágiduvvo dat Duiskka gávpogis Kasselis ja Greikka oaivegávpogis Atenas.
Oktage sámi dáiddár ii leat ovdal čájehan bargguidis dán riikkaidgaskasaš čájáhusas.
– Hárvenaš dáhpáhus, dadjá Sámi dáiddaguovddáža direktevra, Jan Erik Lundström.
Deaŧalaš čájáhus
Documenta adnojuvvo leat okta deaŧaleamos ođđaáiggi dáiddadáhpáhusain, ja čájáhussii čájehit hui stuorra beroštumi sihke preassa ja ámmátlaš bargit dáiddamáilmmis.
Čájáhus, mii bistá 100 beaivvi, lágiduvvui maŋimuš 2012:s, ja dan gallededje dalle badjel 850 000 guossi. Lohku 14 čájeha ahte dat lágiduvvo 14. gearddi.
Lundström lea rámis go lea vejolašvuohta čájehit sámi dáidaga riikkaidgaskasaččat, ja lasiha dasto man deaŧalaš bovdejupmi lea dan ovttaskas logi dáiddárii.
– Dát lea sámi dáidaga dohkkeheapmi ahte maiddái dat lea máilmmeviidosaš. Dieđusge lea dát maiddái hui deaŧalaš dáhpáhus ovttaskas dáiddára karrierii. Riikkaidgaskasaččat lea sámi dáidagii stuorát beroštupmi go dáppe sámiid lagaš guovlluin, dadjá Lundström.
Dáiddárat geat servet Kasselis ja Atenas leat Hans Ragnar Mathisen, Britta Marakatt-Labba, Synnøve Persen, Joar Nango ja Máret Ánne Sara.
Dasa lassin leat maiddái Iver Jåks ja John Savio dáidagat mielde dán čájáhusas.
Sámediggepresideanta Vibeke Larsen lea Kasselis geassemánu 8. beaivvi rájes geassemánu 11. beaivái, dieđiha Sámediggi preassadieđáhusa bokte.
