Guhtemuš dáin evttohasain ánssáša guoddit namahusa «Dán jagás sápmelaš»?
Ávvir lea lohkkiin ožžon árvalusaid listui, ja dasa lassin lea Ávvira doaimmahus maid válljen evttohasaid.
– Lean ilus go fas bidjat johtui «Dán jagáš sápmelaš» jienasteami. Mii leat čohkken buriid evttohasaid geat leat beaggán iešguđetge surggiin dán jagi. Mun sávan oallugiid jienastit su gean oaivvildit ánssášit guoddit namahusa dán jagi ovddas, dadjá Ávvira sadjásaš neahttadoaimmaheaddji, Roy Arthur Olsen.
Son guhte jienastuvvo «Dán jagáš sápmelažžan», oažžu diploma man sámi dáiddár Kamilla Marie Triumf lea hábmen.
– Vaikko bálkkašumis ii leat ruhtavuoitu, de lean ožžon dieđuid ovddit vuitiin ahte sin mielas lea leamaš stuora gudni nammaduvvot «Dán jagáš sápmelažžan». Sávan maid ahte sii guđet leat evttohuvvon dán jagi, atnet árvvus dan ahte min lohkkit leat evttohan sin, dadjá Olsen.
Jienastanvuohki
Dán jagáš jienasteapmi doaibmá seammaládje go diibmá. Ávvir šattai moatti jagi áigi rievdadit teknihkalaš osiid dan dihte go jienasteamis šattai vuoigatmeahttun gilvu.
Dál lea jienasteamis IP-ráddjen, nu ahte ii sáhte eará go oktii jienastit seamma IP-čujuhusas. Danne ávžžuhit ge olbmuid jienastit ruovttus dahje mátketelefovnnain, mobiilaneahta bokte. Bargosajiin lea bargiin seamma IP-čujuhus, nu ahte danne ii sáhte go oktii jienastit juohke bargosajis.
Loga evttohasaid birra vuollelis áššis!
DÁ LEAT EVTTOHASAT:
Mihkkal Hætta
23-jahkásaš lei njunnošis miellačájáhusain mat dáhpáhuvve Oslos guovvamánus ja njukčamánus. Son gullá nuoraid searvái geat álggahedje akšuvnnaid Oljo- ja energiijadepartemeanttas.
Čakčamánus son fárrii lávvui, gasku oaivegávpoga, Stuoradikki olggobeallai, ja lávostalai mánu doppe, čájehan dihte ahte ii dohkket movt eiseválddit barget Fovse ja muđui sámi álbmoga vuostá.
Mihkkal Hætta lea sámi filbmadahkki ja sus lea gullevašvuohta boazodollui.
Lassin dasa go lea oassin Fovse-akšuvnna joavkkus, de lea Mihkkal dán jagi nammaduvvon Riddu Riđđu festivála nuorra dáiddárin.
NSR-Nuorat
Vaikko dávjá leaba Elle Nystad ja Ella Marie Hætta Isaksen geat oidnoba medias, de lea olles joavku fárrolaga evttohuvvon «Dán jagáš sápmelažžan». Sii leat moaddelogis oktiibuot, ja sii leat ovttasbargan joavkun Fovse-akšuvnnaid oktavuođas.
Sii leat olles 2023 bargan áššiin ja bidjan fuomášumi áššái. Olu sin barggus lea ektodáhtolaš bargu. Sii leat inspireren ja leamaš ovdavázzin sámi nuoraide.
Katja Gauriloff
Katja Gauriloff bagadalai historjjá vuosttaš nuortasámegiel fikšuvdnaealligova Je’vida, mas lei máilmmivuosttaseahket Tribeca-filbmafestiválas New Yorkkas. Suomas Je’vida jorrá dál filbmateáhteriin ja das leamašan jo badjel 10 000 geahčči.
Katja Gauriloff čalmmustahttá filmmas sámiid historjjá, mo internáhttaeallin ja eanetlohkoservodaga badjelgeahččan lea čuohcan sámiide, ja ožžon máŋgasiid hilgut sámevuođaset.
Nuortalaš filbmadahkki oaččui Amnesty International bálkkašumi loahpageahčen jagi, go iežas filbmabargguid bokte lea gieđahallan olmmošriektegažaldagaid.
Kristin Harila
2021:s álggahii goargŋunprošeavtta mas áigumuššan lei šaddat máilmmi jođáneamosin gizzut máilmmi 14 alimus várrái. Koronagáržžidusaid geažil ii ožžon goargŋunlobi guovtti várrái ja šattai botket máilmmiolahusgeahččaleami.
Son ii vuollánan ja mearridii ahte geahččala nuppes čađahit prošeavtta dán jagi. Dat mearkkaša ahte lea gorgŋon guktii masá buot daid váriide.
Suoidnemánu loahpas son ollii K2 várrečohkkii ja nu časkkii máilmmiolahusa.
Ii okta ge leat gorgŋon máilmmi 14 alimus várrái seamma jođánit go Kristin Harila. Son lea ilus maŋŋel go lea olahan máilmmiolahusa ja sutnje leamaš dehálaš fuomášuhttit sámevuođa gizzunprošeavtta oktavuođas. Son lea oainnat agibeaivvi dovdan iežas sápmelažžan.
Harila geasehii mielde sámi leavgga buot čohkaide.
Malene Trosten Cottew
Sápmelaš skohtercrossvuoddji Malene Trosten Cottew šattai máilmmimeašttirin cuoŋománu loahpas.
Son birgehallá bures skohtercrossvuodjimis ja vuittii Amerihká skohtercross Amsoil nissonluohká ráidogilvvu goalmmát gearddi.
Trosten Cottew vuittii bálkkašumiid «Dán jagi skohtervuoddji» ja «Dán jagi mohtorvaláštalli» Motorsportgallas 2023.
Katarina Spik Skum
Katarina Spik Skum lea okta dáiddáriin guhte lea čiŋahan Guovdageainnu vuođđoskuvlla. Son lea duodjemeašttir ja ožžon olu stipeanddaid, nu go Sámi muitofoandda stipeandda, Sámi Art-stipeandda, Asa Kitok -stipeandda ja Ganneviksstipendiet.
Ganneviksstipendiet lea okta dain eanemus árvosaš stipeanddain Ruoŧas, ja juohkehaš guhte oažžu dan oažžu 500 000 ruvnno. Katarina Spik Skum dáidagat leat olihan ollu viidábut go Johkamohkkái.
Son lea maid oassi Joar Nango girjegumpi prošeavttas mainna lea leamaš earret eará Nationálamuseas ja Venezias.
Britta Marakatt Labba
Britta Marakatt Labba dáidá leat vuosttaš sámi dáiddár guhte ovttasbargá dovddus bivttasmearkkain hábmet biktasiid. Son lea dán jagi álggahan ovttasbarggu Klättermusen bivttasmearkkain. Lea vuosttaš geardde go Klättermusen ovttasbargá geainnage.
Son lea maid Kristallen-bálkkašumi vuoiti ja sus leat dáidagat Nationálamuseas.
Son čalmmustahttá sámi kultuvrra ja historjjá, bargá maid akvareallain, bácciin, installašuvnnaiguin ja grafihkain. Guovddážis su dáidagis lea birasseailluheapmi ja dálkkádatváikkuheapmi eamiálbmogiid geahčastansajis. Su politihkalaš áŋgiruššan lea guovddáš oassi su dáiddabarggus ja son movttiidahttá nuorat buolvva dáistalit luonddugáhttema ja sámi vuoigatvuođaid.
Elle Sofe Sara
Rešissevra, koreográfa ja okta Dáiddadálu vuođđudeddjiin. Son lea johtán viidát máilmmis iežas bargguiguin, earret eará sudno Joar Nango áigeguovdilis dánsačájálmasain «BIRGET; ways to deal, ways to heal», mii lea vástádus oarjemáilmmi riikkaid guorahallan- ja soabahankommišuvnnaide mat galget guorahallat stáhtaid systemáhtalaš veahkaválddi unnitlogujoavkkuid vuostá. Son lean vuoitán olu stuora bálkkašumiid nu go Telenora kulturbálkkašumi 2023. Dál lea son ráhkadeame máilmmi vuosttaš luohtemusikálafilmma.
Mathis A. Oskal
«Søringen ja Samen» TV-ráidduin lea son fárrolaga Anders Kråkevikain čájehan boazodoalu duohtavuođa. Son lea olles Norgga álbmogii, somás vugiin, čájehan makkár dilli Sámis lea.
Dál leaba ráhkadeamen nuppi áigodaga ráiddus, ja dán vuoru galgá Mathis leat šaddoboanda Hardangeris, ja olbmášguovttos galgaba maid Mongoliai oahpásmuvvat sin boazodoaluin.
Essi Morottaja
Anáraš Essi Morottaja lea rahčan anárašgielat mánáid musihka ovdii. Son fuomášii ahte anárašgielat mánát maid dárbbašit iežaset musihkkaprográmma ja lávlagiid, maid lea álki lávlut ja stoahkat mielde.
Son lea Šuoŋâpiäju (Šuokŋabiedju) tv-ráiddu eadni ja lea jurdaga duohken. Šuokŋabiedju bálkkašuvvui dán jagi musihkkadahku -dovddastusain ja lea maid earáge bálkkašumiid evttohassan dán jagi. Morottaja maid čálii ja lávllui lávlagiid prográmmas.
Morottaja lea maid bargan buvttadeaddjin Šuoŋâsuonjâreh-fidnus, mii buvttada musihka, man sáhttá geavahit beaivedivššus, ruovttus ja skuvllas. Sii buvttadit maid rávvagiid oahpaheddjiide. Dasa lassin Morottaja jođiha astoáiggis mánáid musihkabottu anárašgillii ovttas Satu Kangasniemiin Anára gilis.
Jienasteapmi lea rabas 26.12 diibmu 23.59 rádjai.
