Gonagaslaš Allavuohta Ruvdnaprinsa ja Gonagaslaš Allavuohta Ruvdnaprinseassa galledeaba Girkonjárgga cuoŋománu vuosttaš beaivvi.
Ruvndaprinsabárra áiguba oahppat movt Eurohpá dálá dilálašvuohta váikkuha Mátta-Várjjaga olbmuide, gielda mas lea rádji Ruššii, dieđiha Stáhtahálddašeaddji preassadieđáhusas.
Vuosttažettiin galget gieldda jođihangoddi, Barentsčállingoddi ja Girkonjárgga ealáhussearvi juohkit dieđuid ruvdnaprinsabárrii, nu galget boradit muhtin Mátta-Várjjaga ássiiguin geat leat bovdejuvvon ovddasteaddjin. Dasto galgaba Basen nuoraidklubbii gos deaivvadeaba ohppiidráđi ovddasteddjiiguin ja nuoraidráđiin, ja Girkonjárgga Puckersiiguin, geat spellet Barents Hockey Leagues.