Ruoŧas lea alit terrorvárra mii dagaha ahte bolesat lasihit rádjegozihemiid miehtá riikka.
Ruoŧas lea alit terrorvárra ja eiseválddit ávžžuhit Ruoŧa ássiid eallit dábálaččat, muhto seammás leahkit gozuid alde.
– Borgemánu vuosttaš beaivvi bođii ođđa láhka fápmui mii dagaha ahte bolesat álkibut besset gozihit rájiid. Láhka heive bures min sihkarvuođadillái mii mis dál lea, dadjá davimus guovlluid boleshoavda Lars Wahlberg SVT Sápmái.
Alit terrordássi
Ruoŧa bolesat leat lokten sin gearggusvuođa ja alidan terrordási goalmmát dásis njealjádii. Bolesat maid lasihit Norgga ja Suoma rádjegoziheami, nu mot hámmaniin ja girdišiljuin.
– Mii ávžžuhit almmolašvuođa eallit nu movt dábálaččat, muhto váldit vuhtii áitaga mii lea Ruoŧas dál, dadjá boleshoavda Wahlberg.
