Dan 20 jagis go Ruijan Kaiku áviisa lea ilbman, lea leamaš seamma olmmoš váldodoaimmaheaddjin gitta dássážii, go dál váldá Heidi Nilima Monsen badjelassii dán ámmáha.
Dan 20 jagis go Ruijan Kaiku áviisa lea ilbman, lea leamaš seamma olmmoš váldodoaimmaheaddjin gitta dássážii, go dál váldá Heidi Nilima Monsen badjelassii dán ámmáha.
– Mun illudan joatkit gaskkustit kveanaid ja norggasuopmelaččaid jienaid, lohká ođđa váldodoaimmaheaddji preassadieđáhusas.
Nilima Monsen lea jo doaibman áviissa váldodoaimmaheaddjin maŋimus jagi, muhto jahkemolsašumi oktavuođas válddii badjelasas virggálaš ovddasvástádusa.
Heidi Nilima Monsen lea 37 jagi boaris ja Álttás eret. Son lea bargan journalistan Ruijan Kaikus 2013 jagi álggu rájes. Nilima Monsenis lea kantuvra Álttás, Altaposten visttis.
Ođđa lávddit
Maŋimuš jagiid lea Ruiijan Kaiku almmuhan logi báberáviissa jahkásaččat. Dasa lassin leat ráhkadeamen sierra elektrovnnalaš hámiid ja nannemin ruijan-kaiku.no kveanaid neahttaáviisan.
– Neahttaáviissa bokte sáhttit olahit eanet lohkkiide go maid báberáviissa bokte dahkat, soaitit maid olahit ođđa lohkkiidjoavkkuide. Neahtas sáhttit almmuhit ođđa áššiid juohke beaivvi, dat mearkkaša ahte sáhttit fállat eanet áigeguovdilis áššiid, dadjá Nilima Monsen.
Njálmmálaš giellaáŋgiruššan
Lassin čálálaš áššiide neahtas ja báhpiris, de áŋgiruššá Ruijan Kaiku maid fállagoahtit njálmmálaš sisdoalu jietnafiillaid, podcastaid, videoreportášaid ja filmmažiid bokte.
– Mii sáhttit gillii fokuseret eará ládje go ovdal, go fállat filmmažiid ja jietnafiillaid main lea áigeguovdilis kveana sisdoallu. Kveanagiella lea hearkkes ealáskahttindilis, ja mii vásihat ahte kveanain lea stuorra dárbu gullat iežaset giela. Go kveanagiella ii leat leamaš skuvllafágan, de eanaš kveanat rahčet lohkat ja čállit eatnigillii, vaikke máhttet hállat giela. Dál leat hui unnán báikkit gos sáhttá gullat kveanagiela, nu šaddet jietnafiillat ja filmmažat dehálaš oassin giellaealáskahttimis, dadjá ođđa váldodoaimmaheaddji.
Nilima Monsen lea jo álggahan njálmmálaš áŋgiruššama.
– Mii leat jo bádden ja almmuhan historjjá vuosttaš ođđajagisártni kveanagillii. Dat lei stuorra dáhpáhus, ja dehálaš vásáhus. Dál illudat eanet dákkáraš prošeavttaide, mojohallá son.
Ovddeš váldodoaimmaheaddji rahčan maŋimuš 10 jagi
Liisa Koivulehto, guhte álggahii áviissa 20 jagi dassái, ja guhte lea leamaš váldodoaimmaheaddji dássážii, joatká Ruijan Kaikus journalistan.
– Mun lean illudan dasa go in dárbbaš šat hovdet, muhto baicce leat oassin veagas ja joavkkus. Maŋimuš logi jagi lean hirbmasit rahčan. Lei issoras geahpádus oažžut mielbargi olles áigái! Heidis leat idéat já máhttá áššiid maid mun in hálddaš ja nuppe ládje. Dát šaddá miellagiddevaš, lohká Liisa Koivulehto.
– Lean hirpmástuvvan dan nana barggu geažil maid Liisa lea dahkan Ruijan Kaiku ovddas dán 20 jagi, ja stuorra vuollegašvuođain válddán badjelassii váldodoaimmaheaddjiámmáha. Lean hui ilus go son lea ain mielde viidásat, dadjá Nilima Monsen.
