Rovdata lea váldán vuostá ja iskan 158 jápmán boraspire Troandima laboratorias maŋimuš jagi. Nu mo ovddit jagiid, de leat eanaš stuorra boraspiret goddon earre- ja liseansabivddus.
Jápmán eallit leat goddon bivddus, vuojahallon dahje jápmán iešguđetlágan lunddolaš sivaid geažil. Norggas sáddejit buot dáid jápmán stuorát boraspiriid, nugo albasa, geatkki, guovžža ja gumppe Rovdata Troandimii gos isket daid. Dieđihuvvon jápminsivva dárkkistuvvo, earret eará deaddu, guhkkodat, vuoibmi, lea go guoddán ja ahki. Dasa lassin váldet maid iskosiid dehkiin, vuoivasiin ja manimuččain.
Jus lea politiijaášši dahje navdet lobihuššamis sáhka, de fuolaha Veterinearainstituhta rumašiskama/obdukšuvnna dan boraspires.
Rovdata iskkai 07.06.2022–01.06.2023 áigodagas 158 stuorra boraspire, mat ledje 14 guovžža, 54 albasa, 66 geaŧkki ja 24 gumppe.
– Mii leat iskan 90 varrisa ja 68 njiŋŋalasa. Eanaš dáid ealliin, 104 ealli, ledje gaskal 1–4 jagi boarrásat. 30 ealli eai lean velá jagi ge deavdán ja 21 ealli ledje 5–9 jagi boarrásat. Boarrásamos lei albbas mii lei 10 jagi boaris ja geatki mii lei 14 jagi boaris. Ovtta gumppes váilo bánit, nu ahte mii eat sáhttán gávnnahit dan agi, lohká Rovdata bajitinšenevra Frode Holmstrøm preassadieđáhusas.
14 jagi boares geaŧki
Boarrásamos guovža maid iske lei 5 jagi boares njiŋŋelasguovža mii lei báhččon Lierne báikkis miessemánu 22. beaivvi. Dan guokte čivgga goddojedje maid dalle. Boarrasamos albbas lei 10 jagi boaris varris albbas mii vuddjui biilii Troandimis miessemánu 10. beaivvi 2023. Oppdal báikkis liseansabivddus 05.01.2022 báhččui boarrasamos geatki mii lei njiŋŋelas ja 14 jagi boaris. Boarrasamos gumpe báhččui Våler báikkis 10.02.2023. Dat lei gumpeciiku mii lei 5 jagi boaris.
Goddon bivddus
137 ealli báhččojedje bivddus, sihke earre- ja liseansa ja vahátbivddus. 9 ealli vuddjojedje johtolagas. 11 eallis ledje eará jápminsivat nugo goddon heahtegádjuma dihte dahje ealliidčálggu dihte, amas jápminsivva, lobiheamet goddon dahje eará eallái goddon.
– Boraspiret maid mii leat dán áigodagas iskan, ledje buori vuoimmis, eaige dain leat dávddat. Orkland gielddas gávdnui jápmán okta badjelmeari ruoidnan jahkásaš albbas, muhto eat dieđe siva manin dat lei nu ruoidnan, lohká Holmstrøm.
Rovdata.no neahttabáikkis sáhttá eambbo lohkat.
