Dušše bealli Davvi-Norgga Universitehtabuohcceviesu bargiin basset gieđaid spriittain ovdal go váldet borramuša buohcceviesu gáfedagas.
Dušše bealli Davvi-Norgga Universitehtabuohcceviesu bargiin basset gieđaid spriittain ovdal go váldet borramuša buohcceviesu gáfedagas.
Vihtta beaivvi leat medisiidnastudeanttat čuvvon mielde basset go Davvi-Norgga Universitehtabuohcceviesu bargit gieđaid spriittain ovdal go váldet borramuša gáfedagas mii leat bargiid ja pasieanttaid várás.
Dušše bealli dahká dan.
– Gáfedagas deaivvadit buohcceviesu bargit, pasieanttat, oapmehaččat ja eará guossit. Jus olbmot eai buhtis gieđaideaset spriittain ovdal go váldet biepmu borramušbuffein, de sáhttet bakteriijat leavvat ja bargit sáhttet njoammudit iežaset ossodaga pasieanttaid, dadjá medisiidnastudeanta Caroline W. Røsnæs Hagelien.
Nissonat čeahpimusat
Viđa beaivvis leaba Hagelien ja Barbro M. Paulsen registreren geavahedje go Kafé Evert 2015 guossi spriitabassanrusttega mii lea gáfedaga olggobealde.
– Nissonolbmot, geat barget buohcceviesus, leat čeahpimusat buhtistit gieđaid. 46 proseantta nissonolbmuin basse gieđaid, ja dievdduid gaskkas fas basse 39 proseantta, dadjá Paulsen.
Studeantaguovttos leaba hirpmástuvvan go operašuvdnaossodaga bargit eai molsso biktasiid ja basa gieđaid ovdal go bohtet gáfedahkii.
– Sii rihkkot uniforbmanjuolggadusaid ja dasa lassin basai dušše okta ruonábivttasbargi gieđaid. Oktiibuot 12 bargi bohte operašuvdnabiktasiiguin gáfedahkii, čilgeba soai Romssa universitehta neahttasiidduide.
Dáhttuba čalmmustahttit dehálašvuođa
UiT Norgga Árktalaš Universitehta doavtterstudeanttaguoktá ulbmil lea čalmmustahttit giehtabuhtisteami dehálašvuođa.
– Heajos giehtabuhtisteapmi lea máilmmiviidosaš hástalus ja Norggas hedjona giehtabuhtisteapmi. Jus buohcceviesuin šluhttejit, de levvet antibiotikaresisteansa bakteriijat. Moai sávve ahte guorahallan lea mielde čalmmustahttimin man dehálaš lea bassat gieđaid, dadjaba Hagelien ja Paulsen.
