Rievssatbivdit leat Finnmárkkus dieđihan báhčán 14.400 rievssaha ja 5 230 girona dássážii smávvafuođđobivddus.
Rievssatbivdit leat Finnmárkkus dieđihan báhčán 14.400 rievssaha ja 5 230 girona dássážii smávvafuođđobivddus.
Vásáhusaid vuođul de lea dál 95 proseantta rievssatbivddus čađahuvvon ja logut čájehit ahte leat measta bealli unnit rievssahat báhččon go diibmá, čállá Finnmárkkuopmodat preasašdieđáhusastis.
Oktiibuot ledje golggotmánu 17. beaivvi aktiverejuvvon 31 652 bivdobeaivvi 2016 čakčii.
Bivdoboađus heive oktii rievssatlohkamiin mii čađahuvvui borgemánu loahpageahčen.
– Finnmárkku rievssatmáddodat lea oktiibuot njiedjan sullii 70 proseanttain 2015 rájes, ja dát vuhtto bivdostatistihkas. Bivdologut čájehit ahte leat báhččon beali unnit rievssahat go seamma áiggi diibmá, dadjá FeFo meahccehálddašeaddji Even Borthen Nilsen.
Čieža proseantta máddodagas
14 400 rievssaha mearkkaša ahte leat báhččon birrasii 7 proseantta dan máddodatmeroštallamis mii meroštallui rievssatlohkamis. Nilsen dadjá ahte boađus lei nu go vurdojuvvon.
Dát lea čielgasit ávžžuhuvvon bivdomeari siskkobealde, mii ii berre dahkat eambbo go 15 proseantta máddodagas.
Dutkan čájeha ahte bivdu gitta 15 proseantta rádjái mearkkaša hui unnán čuovvovaš jagi bessodatmáddodahkii. Maŋemus vahkkuid leat leamaš dađistaga unnit rievssatbivdit Finnmárkku mehciin.
Danne lea čielggas ahte dán jagi bivdoboađus vuordimis šaddá birrasii 16 000 rievssaha.
– Dál oaidnit ahte lea jaskkodan. Golggotmánu 15. beaivvi rájes ii leat leamaš báljo makkárge aktivitehta. Vaikko koartavuovdin lea garrasit lassánan dán čavčča, de leat registrerejuvvon unnit bivdobeaivvit go seamma áiggi 2015:s. Dát čájeha ahte bivdit váldet ovddasvástádusa, loahpahit bivddu árrat eai ge mearihutta, dadjá Even Borthen Nilsen.
Guovdageaidnu bivnnuheamos
FeFo lei golggotmánu 19. beaivvi vuovdán 8 381 bivdokoartta, ja seamma áiggi 2015:s lei vuovdán 6 776 koartta.
Lassáneapmi lea vuosttažettiin olggobeale bivdiid geažil.
Go muhtin báikkiin lea garra bivdodeatta, de lea FeFo várren rievssat- ja vuovdeloddebivddu oktiibuot ovcci bivdoguovllus bivdiide geat orrot Finnmárkkus.
