Jägareförbundet Árjjatluovis Ruoŧas gáibida ahte olgoriikka bivdiin, geat bohtet gildii, galgá leat bággu bálkáhit báikkálaš bivdoofelačča. – Lean deaivvadan olgoriikabivdiid bivdimin gos ii leat lohpi bivdit, lohká sátnejođiheaddji Elisabeth Lestander.
Eanet ja eanet olgoriikka rievssatbivdit leat fuomášan Árjjatluovi duottarguovllu ja báikkálaš ealgabivdiid mielas lea dat šaddan váttisvuohtan. Dál gáibida Jägareförbundet Arjeplog ahte bivdiin galgá lea bággu bálkáhit báikkálaš ofelačča, čállá svt.se.
– Báikkálaš bivdoofelaš galgá oahpahit olgoriikka bivdiide makkár njuolggadusat leat ja ahte daid galgá čuovvut, lohká sátnejođiheaddji Elisabeth Lestander ja lasiha:
– Ealgabivdit, geat bivdet bajábeale bivdinrájá, oidnet muhtimin olgoriikka rievssatbivdiid stáhta eatnama alde go sii leat bivdimin ealgga. Mis lea seamma stuorra vuoigatvuohta bivdit doppe go sis, muhto mii han fertet oažžut dieđu dan birra.
Nubbi eará váttisvuohta lea ahte olgoriikka rievssatbivdit bivdet olbmuid priváhta eatnamiid alde gos ii leat lohpi bivdit. Lestander bivdá leanastivrra buoret dárkkistit olgoriikka rievssatbivdiid bivddu.
Maŋimuš viđa jagis lea olgoriikka rievssatbivdiid lohku Norrbottenis beliin sturron, 400 bivdokoarttas 860 bivdokortii. Leanastivra muitala ahte eanaš rievssatbivdit bohtet Itálias ja Tuiskkas. Dan muitala Norrbotten Leanastivrra fuođđobargi Rebecca Forsberg svt.se:i.
