Go Eurohpá stuorámus eamiálbmotfestivála lágiduvvo 32. geardde, de eai seastte maidege otná artistaalmmuheamis. Sihke Rolffa ja Hildá & Tuomas leat oassin prográmmas, ja festivála bealis lohpidit feastamovtta man ii vajálduhte jur dakkaviđe.
12 jagi leat gollan dan rájes go Rolffa čuojahii Riddu Riđus, ja dán geasi máhccet gehččiidjiellahat čáppa Olmmáivággái. Rolffa joavku šattai dovddusin «Partyjoik» lávlagiin, mii maŋŋel lea gohčoduvvon Finnmárkku álbmotlávllan, ja musihkkajoavkku bealis leat iežaset nammadan Finnmárkku joavkun mii dáhkida partydovddu.
Hildá & Tuomas čuojaheaba vuosttaš gearddi Riddu Riđus suoidnemánus. Jietnaduovdagis, man vuođđun lea improvisašuvdna ja latnja gaskal gájanasa ja ritmmaid, deaivvada Hildá eteralaš vokála Tuomasa samplingaiguin. Tuomas Norvio bargá jietnahábmejeaddjin, komponistan, musihkkárin ja buvttadeaddjin ja sus lea duogáš elektronikas. Hildá Länsman lea beakkán komponista ja teakstačálli, son lea vuoitán musihkkabálkkašumiid ja áŋgiruššá juoiganárbevieru ovddas. Soai leaba čuojahan ovttas 2017 rájes.
– Rolffa ja Hildá & Tuomasa konsearttat šaddet áibbas vilda vásáhusat! Diehtit ahte oallugat min gussiin leat sávvan Rolffa lávdde nala máŋga jagi juo, ja lea suohtas sáhttit addit sidjiide dán. Hildá lea máŋgga háve čuojahan midjiide eará prošeavttain ja guođđá álo čiekŋalis luottaid vuoibmás jienainis ja gaskkustanattáldagainis. Su vokála ovttas Tuomasa samplingaiguin lea skeaŋka Sápmái, lohká festiválahoavda Sajje Solbakk preassadieđáhusas.
Riddu Riđđu lágiduvvo suoidnemánu 12.–16. beivviid. Dássážii lea festivála almmuhan ahte Ana Tijoux, Resirkulert, Katarina Barruk, Lávre ja Manne čuojahit konsearttaid.
