Duohtavuođa- ja soabahankommišuvnna raportta oktavuođas háliida festiválahoavda Sajje Solbakk ráhkadit saji váttes ságastallamiidda dán jagáš festiválas.
Suoidnemánu 12.–16. beivviid lágiduvvo Riddu Riđđu fas Gáivuonas.
Dán jagi almmuha festivála ođđa konseaptta: Lávvosáhka. Dás háliida festiválahoavda fállat molssaeavttu digaštallamii ja máhccat iežas kultuvrra ruohttasiidda. Lávdi galgá eret, ja gehččiid ja ságadolliid gaskka ii galggá leat nu oinnolaš erohus.
– Jáhkán olusat leat vásihan ahte buoremus ságastallamat gevvet go čohkkájit rieggás, áinnas dola birra dahje lávus. Lea dat oahpes oadjebasvuođadovdu maid mii háliidat váldit mielde Lávvosáhka-ságastallamiidda, dadjá Solbakk.
