Sápmelaččat dahket dál nugo Amerihkká álgoálbmogat, dinejit ruđa casinoin. Báhccavutnii rahpasa goit fargga Golden Ája Lapland Casino & Motel.
Prošeavtta namma lea AirLab 18, ja lágiduvvo cuoŋománu 25.beaivvi. Girječálli Sigbjørn Skåden ja govvadáiddár ja arkiteakta Joar Nango leaba ceggeme casinočájálmasa Golden Ája Lapland Casino & Motel.
Geahččit spellet
Muhto dát čájálmas, man čájehit ovttas Hålogalándda Teáhteriin, ii leat dušše čájálmas, muitala Sigbjørn Skåden.
– Dat lea olles vásáhus, go das ii leat dábálaš lávdi. Geahččit leat aktiivvalaččat mielde dán bihtás, go sii leat guossin casinos gos leat moadde neavttára ja casinobargit. Geahččit galget geavahit casino fálaldagaid, sihke speallat ja báras diŋgot juhkamušaid, muitala Skåden.
Vátna bileahtat
Sierra bussiin galget geahččit vuolgit Romssas Gárgámii Báhccavutnii. Skåden muitala ahte busses juo álget dáhpáhusat mat leat oassin casinomátkkis. Dán čájálmassii lea nuvttá beassat, muhto leat dušše 43 saji, ii ge dat leat plánejuvvon eambbo go dan oktii čájehuvvot.
– Muhto go leat oktii čájehan, de lea buorre ohcamušvuođđu lassi ruhtadeapmái. Mis ii leat goit ruhta eambbo dan ovtta hávvái. Danne livččii buorre jus lihkostuvvat viidáseappot ja gulustuvvat viidát dáinna geahččalemiin ja beassat joatkit ain viidáseappot, dadjá Skåden.
Duogášmuitalus
Muitalus mii lea čájálmasa vuođđun, lea finánsaolbmá Anders Anderssona birra, gii lea mearridan casino rahpat Labba siidda guottetbáikái Báhccavutnii. Sus lea jagi 1754 láhkamearrádus gieđas, ja čuoččuha ahte sus lea álgoálbmotvuoigatvuohtan rahpat casino dohko, Su doaimmaiguin manná bures, muhto ii dáidde mannat nu bures su gáidan fulkkiin, speallalas muotkeluoktalaččain Paul Pederseniin. Nu čállá Hålogalándda Teáhter.
Boares kapeallas
Skåden ja Nango leaba ieža leamaš mátkkis máŋgga reserváhtas Arizonas, New Mexicos ja Oklahomas, ja geahčadan movt doppe doaimmahit speallanbáikkiid. Sudno casino, mii galgá leat ovddeš kapeallažis Gárgámis Romssa fylkkas, galgá šaddat sullásaš báiki go dál gárvanišgoahtá.
– Mii leat vuoruhan dohko Black jack pokera ja ruleahta, ja jienat leat maid váldon albma casinos vai šaddá rievttes dovdu doppe, muitala Skåden.
