Fremtiden i våre hender organisašuvdna lea ráhkadan listtu mas oaidná man buorit Norgga gielddat leamaš geahpedit dálkkádatnuoskkideami. Kárášjohka lea 108. sajis ja Guovdageaidnu fas 116. sajis Norgga 356 gieldda gaskkas.
Nuoskkidit go eambbo vai uhcit du ássangielddas? Leat go čeahpibut du gielddas go kránnjágielddas? Galggašii go du gielda leat buoret dan 356 gieldda gaskkas? Fremtiden i våre hender neahttasiiddus oainnát man čehpet dahje funet du gielda bargan.
Kárášjohka ja Guovdageaidnu
Kárášjohka lea áigodagas 2009-2021:s geahpedan nuoskkidemiid 12,6 proseanttain ja Guovdageaidnu 11,9 proseanttain. Sihke Kárášjogas ja Guovdageainnus nuoskkida johtolat eanemusat. Eallinvuogi dáfus nuoskkida gaskamearálaš juohkehaš Kárášjogas 12,1 tonna ja Guovdageainnus 12,0 tonna. Gielddalisttus leat Birasdirektoráhta nuoskkidanlogut mat čájehit man olu gielda lea nagodan geahpedit iežas nuoskkideami 2009-2021 áigodagas, iige man galle tonna dálkkádatgássaid lea geahpedan.
Gielddalistu addá dušše jurdaga mo dálkkádatnuoskkidemiin manná gielddas, iige atte ollislaš gova gieldda dálkkádatpolitihkas.
