Ovttasráđiid geavaheddjiiguin lea Finnmárkkuopmodat (FeFo) mearridan ráfáiduhttit goahppila ja njiŋŋelas hurri skábmamánu 1. beaivvi rájes.
Dán jagaš beahceloddelohkamat čájehedje gaskamearálaš loguid, ja eambbo lottiid go ovddit jagiid. Dán rádjai lea leamaš vejolaš bivdit sihke njiŋŋelas ja varis hurriid ja beahcelottiid. Golggotmánu 20. beaivvi lei FeFos fas čoahkkin NJFF Finnmárkkuin ja Oarje-Finnmárkku loddebeanaservviin.
– Lei čuovvuleapmi čoahkkimii man mii doalaimet ovdal bivddu, gos mearrideimmet reguleremiid ja eriid. Mii árvvoštalaimet bivdostatistihka ja reguleremiid čoahkkimis. Báikkálaččat lei boahtán sávaldat ráfáiduhttit goahppiliid ja njiŋŋelas hurriid. Mii leat čuovvulan sávaldaga ja leat skábmamánu 1. beaivvi rájes ráfáiduhttán goahppila ja njiŋŋelas hurri, čállá FeFo.
Dán jagáš rievssatlohkamat čájehedje Finnmárkkuopmodagas olu lottiid, ja molsašuddan čivgama. Dán rádjai leat bivdit dieđihan báhčán 12 914 rievssaha. Dat lea lassáneapmi diimmá ektui. Bivdologut leat fágalaš rávvemiid siskkobealde. Leat aktiverejuvvon eambbo bivdobeaivvit go ovddit áigodagain, 22 227 beaivvi.
70 vuosttaš bivdi leat dan rádjai registreren nuvttá áigodatbivdokoartta iežaset ássangielddas. FeFo addá nuvttá bivdinkoarttaid Finnmárkkuopmodagas báikkálaš bivdiide vai lea álki álgit bivdit, čállá FeFo.
