Maŋemuš 12 mánu leat norgalaččat gávppašan 15,8 miljárdda ruvnno ovddas ránnjáriikkain. Virke váldoorganisašuvdna oaivvilda dat dagaha ahte Norga manaha 12 000 bargosaji.
Maŋemuš 12 mánu leat norgalaččat gávppašan 15,8 miljárdda ruvnno ovddas ránnjáriikkain. Virke váldoorganisašuvdna oaivvilda dat dagaha ahte Norga manaha 12 000 bargosaji.
Lassáneapmi lea 23,4 proseantta go buohtastahttá 2015 njealját kvartálain, ja 2016 goalmmát kvartálain. Dan čájehit Statistalaš guovddášdoaimmahaga logut.
Dát logut balddihit ealáhusdoaimmaid váldoorganisašuvnna Virke.
– Dál lea rádji ihtán. Mii eat sáhte šat čohkká ja geahččat go duháhiid mielde bargosajit ja miljárddaid mielde vearroruđat eksporterejuvvot Ruŧŧii, lohká Virke direktevra Harald Andersen preassadieđáhusas.
Jáhkká lassánit vel eambbo
Su mielas lea dat issoras ovdáneapmi.
– Dá lea vel ovdal go ráđđehus fápmui bidjá divatlassáneami, mii lea measta 83 proseantta. Mii árvvoštallat ahte vearáska vel go divatlassáneapmi boahtá. Ii oro ráđđehus dan váldime vuhtii, lohká Andersen.
– Masset bargosajiid
Virke lea ráhkadan raportta makkár váikkuhusat rádjegávppašeamis leat.
Raporta deattuha ahte Norgga ealáhusat masset sihke dietnasa ja bargosajiid go rádjegávppašeapmi lassána.
Livčče 11 750 eambbo bargosaji, 7,8 miljárdda árvolassáneapmi ja 4,9 miljárdda eambbo almmolaš dienas Norggas.
Guoskkaha viidát
Andersen oaivvilda ahte ii leat dušše Norgga ealáhuseallin masa dat čuohcá, muhto rádjegávppašeapmi váikkuha maid čielga ealáhusaid.
– Eanet ja eanet gávppašit nuppe bealde ráji, ja dat čuohcá Norgga boanddaide, guolásteddjiide ja biebmoealáhusaide, lohká Andersen.
Raporta čájeha ahte 35 proseantta bargosajiin mat vaháguvvet rádjegávppašeamis leat biebmo- ja jugusindustriijas. (©NTB)
