Ráđđehus ii sáhte guorahallat eret Alimusrievtti duomus, lohká stuoradiggeáirras Lars Halbrekken maŋŋel oljo- ja energiijaministtara otná čilgema Stuoradikkis.
Mánnodaga čilgii oljo- ja energiijaministtar Terje Aasland (Bargiidbellodat) Fovsen-Njaarke-ášši Stuoradikkis. Aasland dajai earret eará ahte ii leat rievttalaš vuođđu gáibidit njeaidit dahje bissehit Fovsen-Njaarke-bieggaturbiinnaid dassá ođđa konsešuvdna lea sajis.
– Ráđđehus ii leat ii lávkki ge ovdánan dán áššis dan rájes go demonstrašuvnnat ledje ráđđehuskvartálas Oslos, lohká Sosialisttalaš Gurutbellodaga stuoradiggeáirras Lars Haltbrekken NTB:i.
Aasland dajai Stuoradikki sárdnestuolus ahte ráđđehus lea doama doama bargamin ođđa mearrádusain, muhto dárbbašit ođastuvvon dieđuid ja máhtu dili birra Fovsen-Njaarkes ja makkár váidudeaddji doaimmaid lea vejolaš bidjat johtui.
– Juohke beaivvi mii gollá, de rihkkojuvvojit olmmošvuoigatvuođat. Dát ii oba leat ge dohkálaš. Olmmošvuoigatvuođarihkkuma ferte bissehit, dadjá Haltbrekken.
