Sosialisttalaš Gurutbellodat bivdá sorjjasmeahttun guorahallama das movt ráđđehusat leat gieđahallan Fovse bieggafápmoášši.
Sosialisttalaš Gurutbellodat (SG) bivdá guorahallat sihke dálá ráđđehusa ja ovddit ráđđehusaid Fovse-ášši oktavuođas. Njukčamánus bivddii ovttajienalaš Sámediggi ahte álggahuvvo sorjjasmeahttun guorahallan Fovse-áššis, vuosttaš áššemeannudeami rájes gitta Alimusrievtti duomu čuovvoleapmái.
Dál lohká SG stuoradiggeáirras Lars Haltbrekken Aftenpostenii ahte sii háliidit dan seamma.
– Sáhttá áinnas guorahallat moatti jagi maŋos guvlui, ja geahččat mo eanet ráđđehusat leat bargan, lohká son.
Son bivdá guorahallat maid dálá ráđđehusa.
– Juo. Lea áibbas jáhkkemeahttun ahte leat geavahan guokte jagi dasa ahte ii bissehit olmmošvuoigatvuođaid rihkkuma mii lea dáhpáhuvvamin Fovses, dadjá Haltbrekken.
Haltbrekkenis ii leat gal makkárge čielga oaivil das gii galggašii dakkár guorahallama čađahit, muhto čujuha ahte Riikarevišuvdna ja Siviilaáittardeaddji leat vejolašvuođat.
(NTB)
