Sosialisttalaš Gurutbellodat (SG) áiggošii unnidit boraspirelogu boazodoalloguovlluin ja sirdit albasiid ja getkkiid Lulli-Norgga guovlluide gos dál eai leat boraspiret.
Stuorradiggeáirras Lars Haltbrekken, gii maid lea Biras- ja energiijalávdegottis, lohká evttohusa unohassan, čállá Klassekampen.
SG reagere go Ráđđehus iežas doaibmabidjopáhkas, mas áigot heivehit bieggaturbiidnapárkkaid boazodoalloguovlluide, evttoha unnidit boraspirelogu jus boazodoallu dohkkeha bieggafámu iežaset guovlluide.
SG áigu baicca sirdit eret boraspiriid, ja Haltbrekken čujuha dasa ahte leat ollu guovllut dán riikkas gos leat unnán dahje eai oppanassiige boraspiret, nugo ovdamearkka dihte Hardangervidda, Vestlandet ja Sørlandet.
– Geatkkit ja albasat livčče stuorra ávkin Hardangerviddai. Doppe rahčá goddenálli dávddaiguin nu go CWD-dávddain. Boraspiret livčče goddán heajos elliid ja čorgen daid eret luonddu eavttuid vuođul, dadjá Haltbrekken.
Luonddugáhttenlihtu jođiheaddji Truls Gulowsen ii ge áiggoše unnidit boraspiremáddodaga. Son maid oaivvilda lea buoret sirdit boraspiriid.
– Mii háliidit bisuhit dálá boraspirelogu ja áinnas lasihit máddodagaid. Dát ii dárbbaš dáhpáhuvvat boazodoalu guohtuneatnamiin, lohká son ja lasiha:
– Eai gávdno makkárge buorit biologalaš sivat dasa ahte geatki ja albbas ii sáhte leat Hardangerviddas. Doppe leat bohccot ovdal leamaš duháhiid jagiid ovttas boraspiriiguin, lohká Gulowsen ja čujuha ahte leat viiddis eatnamat gos dál eai leat boraspiret, muhto gos dat ovdal leat leamaš.
(©NTB)
