Seamma beaivvi go ubmisápmelaččas, Katarina Barrukas, ilbmá ođđa skearru, de almmuha Riddu Riđđu ahte pop-dronnet boahtá boahtte jagi festiválii.
Ubmisápmelaš Katarina Barruk lea iežas atmosfearalaš popmusihkain šaddan dovddus artistan maiddái olggobealde Sámi.
Barruk lea čuojahan Riddu Riđu gussiide soames háve, ja son boahtá festiválii maiddái boahtte geasi.
Katarina Barruk lea bálkkašuvvon artista. Son lea bajásšaddan Luspie ja Gajhrege báikkiin, ja lea maŋimuš 10 jagi johtán miehtá Eurohpá. Son lea ožžon ollu rámi iežas musihkkaovdanbuktima ovddas ja 2020:s oaččui Ruoŧa allaárvosaš bálkkašumi «SKAPs Kulturbärarpris». Barruk lea ovdal almmuhan skearru, ja odne ilbmá ge su nubbi álbuma «Ruhttuo».
Erenomáš musihkkavásáhus
Barruka lávlu iežas eatnigillii, ubmisámegillii, mii lea UNESCO áitojuvvon gielaid rukseslisttus. Barruka musihkka lea popmusihka, árbevirolaš luđiid ja improviserejuvvon osiid seaguhus.
– Mii leat nu rámis go viimmat beassat almmuhit ahte Katarina Barruk čuojaha Riddu Riđus boahtte geasi. Oaidnit su lávddis ovttas su nanu joavkkuin berrejit buohkat vásihit unnimus oktii eallimis. Boahtte geasi oaččut dán erenoamáš vásáhusa ja vejolašvuođa Riddu Riđus. Mii nu illudit, lohká festiválajođiheaddji Sajje Solbakk preassadieđáhusas.
Ovddežis lea festivála almmuhan ahte Herman Rundberga fámolaš soloprošeakta «Manne» ovdanbuktojuvvo vuosttaš gearddi jagi 2023 festiválas.
