Deanu gielda šluhtte buot plánejuvvon doavtterdiimmuid ja laboratoriadiimmuid.
– Mii gohččut sin geat leat ožžon diimmu doaktára luhtte dahje laboratorias ja hávvedikšunlanjas bissut ruovttus. Állet boađe diimmuide jus eará ii leat šihtton, dieđiha Deanu gielda.
Sivvan manne Deanu gielda lea válljen giddet dábálaš diimmuid doavtterbálvalusas lea eastadit pandamia. Doaktárat riŋgejit muhtin olbmuide geain leat doavtterdiimmut čielggadit sajádaga ja árvvoštallat lea go dárbu deaivvadit doaktáriin. Vuodjinlobit, doavtterduođaštusat NAV:i ja eará duođaštusat eai vuoruhuvvo dál. Buohkain geain diimmut leat šluhttejuvvon fertejit ieža váldit ovddasvástádusa diŋgot ođđa diimmu go njoammudilálašvuohta lea jaskkodan.
