Guovtti jagi geahčen galggat sáhttit vuodjit skuteriin Haparandas Gironii.
Ruoŧa eanandoallodoaimmahat lea juolludan 10 millijovnna ruvnno T4 nammasaš prošektii. Ruhta galgá earret eará geavahuvvot válbmet skuhterláhttuid Haparandas Garasavvonii ja Gironii.
– Dáinna ruđain galget láhttut válbmejuvvot, ráhkaduvvot vuogas bisánanbáikkit, galbbat galget ceggejuvvot mat čájehit gokko láhttut mannet, ja dasa lassin galget vel šaldit huksejuvvot. Láhttuin galget oktiibuot leahkit gaskkal 15 ja 20 bisánanbáikki gos leat visttit maid siste sáhttá dolastit. Dáin bisánanbáikkiin galget maid olgohivssegat ja muorraviesut leahkit, dadjá doaibmajođiheaddji Björn Winsa P4 Norrbottenii.
Doaibmajođiheaddji muitala ahte lea dárbu ráhkadit birrasii 140 šaldi čázadagaid badjel vai galgá oadjebas leahkit vánddardit.
Vuosttaš oassi skuhterláhttus, mii manná Haparandas Bájilii ja Gironii, dat galgá válbmejuvvot guovtti jagi siskkobealde. Dan maŋŋel ráhkadišgohtet láhttuid Bájilis Garasavvonii.
Haparanda, Övertorneå, Bájil ja Girona gielda leat mielde T4 ovttasbargoprošeavttas.
