Buot tráilarat mat geasehedje guoli ožžo vuodjingildosa go Stáhta geaidnodoaimmahat dárkkistii daid Deanu guovllus.
Stáhta geaidnodoaimmahat dárkkistii mannan sotnabeaivvi stuora vuojániid Deanus, Njávdámis ja Uvduvuonas Mátta-Várjjagis.
Buot tráilarat mat geasehedje guliid ožžo vuodjingildosa dassážii go ledje bissehan čázi golgamis gálvojorris geainno ala.
– Guollečáhci dagaha geainnuid gáljan ja dat sáhttá šaddat hui várálažžan mohtorsihkkelvuddjiide, čilge Stáhta geaidnodoaimmahat preassadieđáhusas.
Stáhta geaidnodoaimmahat váiddii guokte stuorabiilavuoddji. Ovtta tráilaris ii lean leahttočálli mii lei kalibrerejuvvon. Son oaččui lobi vuodjit lagamus divohahkii ordnet dan ja fitnodat váidojuvvui. Nuppi biillas lei ges vuoddji geas ii lean lahttočállinkoarta iežas namas. Son váidojuvvui ja šattai oažžut eará vuoddji biilii ovdal go beasai vuolgit viidáseappot.
Okta fitnodat ges sáhkkohalai go personbiila ii lean čađahan geatnegahtton EU-dárkkisteami. Biillas válde eret šilttaid ja fitnodat oaččui vel 1850 ruvnno sáhkkun.
Stáhta geaidnodoaimmahat dárkkistii maid juvllaid ja deahkaid. Okta fitnodat sáhkkohalai go biillas ledje guokte hui gollan dálvedeahka.
