Fylkkaráđđi Karin Eriksen ja Bjarne Rohde leaba mielde máilmmi stuorámus borramuš- ja eanadoalomeassuin, Grüne Woche Berliinnas Tuiskkas, gos earret eará 13 oahppi ja oahpahalli lea mielde ovddideamen Davvi-Norgga borramuškultuvrra.
Romssa ja Finnmárkku fylkkagieldda dieđiha preassadieđáhusas ahte Grüne Woche oasálastin lea Davvi-Norgga fylkkagielddaid ovttasbargu masa 27 fitnodaga lea searvan báikkálaš borramušaiguin.
– Lea dehálaš háhkat nuoraid geain lea gelbbolašvuohta ealáhussii. Ealáhus ferte sihkkarastit doarvái oahpahallisajiid, fylkkagielda fas doarvái skuvlasajiid, ja ovddasráđiid fertet mii movttiidahttit nuoraid vuoruhit dán ealáhusa, lohká Bjarne Rohde.