Finnmárkku sámi suohkaniin lea ovdagihtii jienasteapmi lassánan 2019 válggaid rájes. Ovtta gielddas leat measta bealli jienasteddjiin jienastan ovdagihtii dán jagi.
Norggas leat lagabui 1,3 miljovnna jienasteaddji, 1 278 849 olbmo válljen jienastit ovdal válgabeaivvi. Dat lea 395 129 olbmo eanet go 2019 válggain. Finnmárkku sámi suohkaniin leat maid ovdagihtii jienasteaddjit lassánan 2019 válggaid rájes:
Unjárgga gielddas leat badjel bealli, 51,14 % jienasteddjiin, 360 jienasteaddji, jienastan ovdagihtii dán jagi válggain. Dat lea 75 olbmo eanet go 2019 válggain. Unjárgga gieldda jienastuslogus leat 704 olbmo.
Deanu gielddas leat 24,59 % jienasteddjiin, 569 olbmo, jienastan ovdagihtii. Dat lea 83 olbmo eanet go 2019 válggain. Deanu gieldda jienastuslogus leat 2314 olbmo.
Porsáŋggu gielddas leat 27,69 % jienasteddjiin, 889 olbmo, jienastan ovdagihtii. Dat lea 236 olbmo eanet go 2019 válggain. Porsáŋggu gieldda jienastuslogus leat 3211 olbmo.
Kárášjogas leat 30 % jienasteddjiin, 640 olbmo, jienastan ovdagihtii. Dat lea 34 olbmo eanet go 2019 válggain. Kárášjoga gieldda jienastuslogus leat 2133 olbmo.
Guovdageainnus leat 31,36 % jienasteddjiin, 700 olbmo, jienastan ovdagihtii. Dat lea 95 olbmo eanet go 2019 válggain. Guovdageainnu suohkana jienastuslogus leat 2 232 olbmo.
Válgadirektoráhta siiddus oainnát eará suohkaniid ja gielddaid loguid.