Dálkkádatrievdamat ja eamiálbmogiid dearvvašvuohta leat fáddan go ON eamiálbmotáššiid bissovaš forum álggii New Yorkas, Amerihkás.
Mánnodaga álggii ON eamiálbmotáššiid bissovaš forum (UNPFII) ON váldoguovddážis New Yorkas.
Čoahkkin bistá guokte vahku, cuoŋománu 17. beaivvis gitta 28. beaivái. Forumis digaštallet máilmmi eamiálbmogat sin iežaset váttisvuođaid ja hástalusaid. Oasseváldit besset ovttasbargat oktasaš hástalusaiguin ja ovdanbuktit evttohusaid ON orgánaide ja miellahttoriikkaide.
Dán jagi fáddán leat dálkkádatrievdamat ja eamiálbmogiid dearvvašvuođadilli. Nu besset eamiálbmogat miehtá máilmmi ovdanbuktit sin oaiviliid ja perspektiivvaid dáidda fáttáide.
