Ođđajagemánu 1. beaivvi rájes šaddá ođđa árgabeaivi eanaš busse- ja minibussevuoddjiide dáppe riikkas. Dalle sii fertejit bosádit alkomehterii juohke háve go bohtet bargui.
Jagi 2019 rájes lea leamaš gáibádus ahte buot ođđa bussiin ja minibussiin, mat fievrridit olbmuid mávssu ovddas geainnuid alde, galgá alkolohkka. Vuojániin mat leat registrerejuvvon ovdal 2019 lea leamašan vihtta jagi bidjat alkolohka.
Ođđajagemánu 1. beaivvi 2024 rájes lea dain bussiin ja minibussiin bákkolaš atnit alkolohka. Dat lea dehálaš doaibmabidju mii nanne johtolatsihkarvuođa ja unnida lihkohisvuođariskka alkoholageavaheami geažil, dadjá MA – Rusfri Trafikk váldočálli, Anders Skavdal Havdal.
Alkolohkka lea čoavddus mii lea čadnon fievrru cahkkehanvuogádahkii. Dat hehtte busse ja minibusse vuodjimis jus vuoddjis lea promilla badjel lobálaš dási. Norggas lea lohku biddjon 0,2 promillii.
