-Almmuhus-
-Almmuhus-
-Almmuhus-
SMÁVVAOĐĐASATFinnmárkku politiijat bissehan eambbosiid johtolagas

Finnmárkku politiijat bissehan eambbosiid johtolagas

-

-

Politiijaid ođđa logut čájehit ahte dássážii leat bissehan ja váidán lagabui 200 olbmo, go leat vuodján gárrenoaivvis.

Finnmárkku politiijat leat bissehan ja váidán biilavuddjiid geat leat gárrenoaivvis vuodján. Go buohtastahttá diimmá loguiguin, de leat dán jahkái 180 olbmo bissehuvvon, mii lea vihtta eambbo go diibmá. Muhto dat lea dattetge 137 unnit go Romssas.

MA – Rusfri Trafikk lea organisašuvdna mii bargá dan ovdii ahte ii oktage galgga duššat dahje garrasit roasmmohuvvat johtolagas, ja sii doivot ahte pandemiija maŋŋel leat politiijat fas eambbo oidnosis fas.

– Vai galgá vejolaš váldit eambbosiid, de fertejit politiijat leat oidnosis, oažžut cavgilemiid ja iskkahit sin geaid bissehit. Korona bissehii olu bargguid, muhto dál lea politiijain viimmat vejolašvuohta fas leat eambbo oidnosis johtolagas, eaige dárbbaš jurddašit njoammuneastadeami birra. Mii jáhkkit ahte lohku lea allat dan dihte go politiijat leat fas johtolagas, čilge MA – Rusfri Trafikk generálačálli Elisabeth Fjellvang Kristoffersen preassadieđáhusas.

Son dattetge deattuha ahte dat logut eai čájet olles gova.

– Statistihkka čájeha dušše galle olbmo politiijat bissehit, iige dan man galle olbmo rievtti mielde vudjet gárrenoaivvis. Mii galgat gal dattetge leat giitevaččat go Norggas lea nu buorre politiijabálvalus, mii lea oidnosis ja váldet eret dakkáriid geat leat váralaččat johtolagas, muitala Kristoffersen.

-Almmuhus-