Sámi allaskuvla dieđiha ahte njealje ođđa sámi nuora leat válljejuvvon doaibmat sámi ofelažžan boahtte oahppojagi. Bearjadaga almmuhuvvo Riddu Riđus geat dá njealje nuora leat.
Maŋimus jagi leat Benedikte Eriksen, Linnéa Knutsen, Mathis Eira ja Ole Christer Hætta doaibman sámi ofelažžan, ja geigejit fargga vuoru njealje ođđa nurrii.
Benedikte, gii dál lea geassebarggus ruovttus, buktá rávvagiid ođđa ofelaččaide.
– Šaddá fiinna ja somás jahki gos oahppá olu ofelašdoaimmain. Mun lean ožžon ođđa olbmáid, ja nai muittuid mat mu čuvvot agibeaivái. Mu ráva ofelaččaide lea ahte návddašit dán áiggi, go fáhkka nohká jahki. Seammás muitit váldit vára nubbi nuppis dán áiggis go lehpet ofelaččat, muitala Eriksen preassadieđáhusas.
Váldolávddis almmuhuvvo
Ofelašguovttos Mathis ja Ole Christer leaba almmolaš rahpandoaluin gos ođđa ofelaččat almmuhuvvojit. Dat geavvá Riddu Riđu váldolávddis bearjadaga dii. 18:30.
Gielda- ja guovlodepartemeantta bealis searvá stáhtačálli Nancy Porsanger Anti. Sámedikkis searvá sámediggepresideanta Silje Karine Muotka, ja Sámi allaskuvlla bealis searvá rektor Laila Susanne Vars.
Sámi ofelaččaid prošeaktadoaibma čuovvoluvvo Sámi allaskuvlla bokte ja Gielda- ja guovlodepartemeanta ruhtada doaimma. Ofelaččat čađahit Sámi kultur- ja servodatoahpu Sámi allaskuvllas, ja mátkkoštit joatkkaskuvllain ja eará nuoraiddeaivvademiin miehtá Norgga. Ofelaččaid váldoulbmil lea muitalit sámi kultuvrra ja servodaga birra eará nuoraide Norggas. Ofelašdoaibma álggahuvvui 2004:s.
