-Almmuhus-
-Almmuhus-
SMÁVVAOĐĐASAT SÁMIS Ođđa ovttasbargo­šiehtadus Sáme­dikkis ja Romssa suohkanis

Ođđa ovttasbargo­šiehtadus Sáme­dikkis ja Romssa suohkanis

-

-

Šiehtadus galgá sihkkarastit sámi mánáidgárdesadjedáhkádusa, sámi oahpahusa nannema, sierra Sámi viesu ja kulturmuittuid gaskkusteami, dieđiha Sámediggi preassadieđáhusa bokte.

Bearjadaga geassemánu 18. beaivvi vuolláičálliba Norgga beale sámediggepresideanta ja Romssa sátnejođiheaddji Gunnar Wilhelmsen ođđa ovttasbargošiehtadusa. 

Šiehtadusa ulbmil lea láhčit dili eaktudeaddji ovttasbargui vai sáhttit bisuhit ja ovddidit sámi giela, kultuvrra ja servodaga juohke sajis Romssa-servodagas, dieđiha Sámediggi preassadieđáhusa bokte.

Romssa suohkan lei dat vuosttaš gávpotsuohkan mainna Sámediggi dagai ovttasbargošiehtadusa. Ovttasbargošiehtadus vuolláičállojuvvui Romssas golggotmánus 2013.

– Romsa lea hui máŋgga sápmelačča ja sámi máná ruovttusuohkan, ja illudahttá mu ahte sii háliidit leat ovdavázzisuohkanin, nu go dát ovttasbargošiehtadus čájeha, dadjá sámediggepresideanta Aili Keskitalo (NSR) preassadieđáhusas.

– Šiehtadus lea hui dehálaš Romssa suohkanii. Min máŋggat sápmelaččat suohkanis galget ja fertejit oažžut vejolašvuođa iežaset kultuvrra doaimmahit, oahppat ja ovddidit, masa dát šiehtadus ain galgá láhčit dili, dadjá Romssa suohkana sátnejođiheaddji, Gunnar Wilhelmsen (BB).

-Almmuhus-