Norga ja Suopma šiehtadallagohte fas Deanusoahpamuša maŋŋebárgga, geassemánu 16. beaivvi.
Deanučázádaga guolástanhálddahusa stivrrajođiheaddji John Nystad muitala geassemánu 16. ja 17. beivviid álget fas šiehtadallat ođđa Deanusoahpamuša.
– Dál, maŋŋebárgga ja gaskavahkku, lea easkka siskkáldas čoahkkimat riikkaidgaskasaččat, Norgga ja Suoma joavkkus. Dál easkka álggahuvvo dat doaibma ja loahpahuvvo boahtte giđa mielde. Dán álgodásis šiehttat mo galgá láhttet media ektui, makkár vuogit mis galget leat ja mo mii galgat bargat Teams bokte. Álgočoahkkin lea dehálaš dan dáfus ahte dalle biddjojit gáibádusat guđe láhkai šiehtadallat ja makkár áššit šiehtadallamis galget šiehtadallot. Dál lea vuos gávnnadit, ja iskat vejolašvuođa čoahkkinastit njunnálagaid go ráját ráhppojuvvojit, lohká John Nystad.
Norgga ja Suoma eiseválddiin leat guktuin vihtta áirasa šiehtadallangottis. Guktuid beale rájá báikeolbmuin, vuoigatvuođalaččain, leat fas golbma áirasa. Čoahkkimat bistet logi áiggis guovtti áigái.
Ávvir čuovvu ášši.
