Eallilan máttasápmelaš, Anna Nilsine Joma Granefjell, oažžu kulturbálkkašumi iežas áŋgiruššamiin Mátta-Sámi servodaga ovddas.
Mátta-Sámi kulturbálkkašupmi juhkko jahkásaččat sutnje gii lea áŋgiruššan Mátta-Sámi servodahkii ávkin. Lea Trøndelága fylkkagielda mii ovttasráđiid Gïelie Aernie, Gïelem nastedh, Saemien Sijte, Aejege ja Sijti Jarnge lea vuođđudan dán kulturbálkkašumi. Lassin gudnin ja diplomii oažžu bálkkašumi vuoiti maid ruhtavuoittu.
Dán jagáš jurys leamašan Berit Ellen Gaino Jåma Gïelie Aernies, Hanne-Lena Wilks Gïelem nastedhis, Toini Bergstrøm Aejeges, Nils Johan Jacobsen Sijti Jarnges ja Birgitta Fossum Saemien Sijtes.
Dán jagi, nu mo ovddit jagiin, leamaš olu buori evttohasat oažžut dán Mátta-Sámi kulturbálkkašumi. Juryi lea bargu šaddan váddásabbon, muhto mávssolaš, dieđiha Trøndelága fylkkagielda preassadieđáhusas.
Jury ákkastallan
Mátta-Sámi servodat ii livčče seilon, ii ge ovdánan jus eai livčče lean Mátta-Sámi kulturguoddit njunnošis dan dahkamin. Sii juhket buorredáhtolaččat iežaset máhtu ja leat botnihis diehtogáldut Mátta-Sámi servodahkii. Sii leamaš dehálaččat sámi ásahusaid, organisašuvnnaid ja media huksenbarggus ja leat jienajávohaga dan bargan eaige leat álo dan ánssu ožžon maid sii livčče galgan oažžut. Seailluhit giela ja kultuvrra leamaš lunddolaš oassi sin eallimis, juoidá mii speadjalastá mo sii leat válljen eallit eallima.
Lei dušše «ikte» go eliimet servodagas gos máttasámegiella lei uhcit eanet ja máttasámegiella gullui dušše ruovttuin ja boazodoalus. Iii lean geatnegahtton ahte máttasámegiela galggai oahppat skuvllas ja máttasámegiela ođđasat gullojedje dušše oktii vahkus.
Dán jagi kulturbálkkašumi vuoiti ii váldde nu stuorra saji. Seammás leamaš sus stuorra mearkkašupmi sihke gillii, kultuvrii ja diehtoguoddin sihke iežas báikegottis, muhto maid Mátta-Sámi servodagas. Ruovttus oahpai ja oaččui sihke giela, kultuvrra ja politihkalaš áŋgiruššama ja son geavahišgođii árrat su eatnigiela, máttasámegiela, go barggai dearvvašvuođasuorggis, muhto maid oahpaheaddjin, tulkan, duojárin ja organisašuvdnabarggus. Ulbmil leamaš álo buoridit eavttuid boaresolbmuide, mánáide ja Mátta-Sámi servodagas. Su maŋis báhcet luottat sihke girjejorgalemiin ja dujiin. Eanemus dovddusin šattai go NRK álggahii daid vuosttaš sáddagiid máttasámegillii logi minuhta juohke njealját vahkku. Son lei NRK Sámi vuosttaš Mátta-Sámi reporttar ja son barggai gávcci jagi, seammás go barggai buohccidivššárin.
Dán jagáš bálkkašumi vuoiti lea Anna Nilsine Joma Granefjell.
