Suoma beale Sámediggi lea cealkán ahte ráđđehusa evttohus ruvkeminerálaverrui lea láhkaásaheapmi. Supmii evttohuvvo ođđa ruvkeminerálavearru man galggašii máksit Supmii roggon ruvkeminerálaid ovddas, earret minerálaid mat gávdnojit golledoidimis.
Suoma ráđđehus evttoha ođđa minerálalágavearu Supmii, man galgá máksit ruvkeminerálaid ovddas maid lea roggan Suomas. Dat guoská buot ruvkeminerálaide mat leat namuhuvvon ruvkelágas, muhto ii ruvkeminerálaid ovddas maid gávdná golledoidimis muhtin ráddjejuvvon guovlluin.
– Evttohuvvon ruvkeminerálavearru lea menddo vuollegis dásis. Máilmmis metállamálmmaid árvovuoigatvuođat leat máŋggageardásaččat go veardida Supmii evttohuvvon vearrodássái. Vearroboađuin eai leat bastán ráhkadit dustema vejolaš vahágiid várás, eaige gokčat infrastruktuvrra goluid, lohká Sámedikki ságajođiheaddji Tuomas Aslak Juuso Sámedikki preassadieđáhusas.
Ii leat dohkkehahtti sámi perspektiivvas
Sámediggi buktá ovdan cealkámušas, ahte ruvkedoaibma sámiid ruovttuguovllus ii leat sámiid perspektiivvas dohkkehahtti, iige ruvkeminerálavearru boađe lasihit doaimma dohkkehahttivuođa. Sámediggi cealká ahte ruvkedoaibma ii heive sámiid ruovttuguovllu árktalaš ja hihtásit ođasmuvvi lundui.
– Sámediggi ii oainne vuođustusaid dasa, manin golleroggama oktavuođas gávdnon ruvkeminerálaid galggašii ráddjet ruvkeminerálavearu olggobeallái. Golleroggamis gávdnon minerálat leat seamma láhkai dakkár luondduriggodagat, maid sáhttá oktii geavahit, nu go earáge minerálaid, joatká Juuso.
Suomas mašiinnain rogget golli eanaš sámiid ruovttuguovllus, gos luondu lea rašši ja ođasmuvvá hihtásit. Sámediggi čállá ahte golleroggan vahágahttá luonddu, čázádagaid ja sámiid vejolašvuođaid bargat guovllus árbevirolaš ealáhusaiguin. Sámediggi atná govttolažžan dan, ahte nu gohčoduvvon stáhta eatnamiin golleroggit oassálastet vearumáksimii ja váldet iežaset oasis vásttu ođasmuvakeahtes luondduriggodagaid eatnamis eret váldimis
