8 fitnodaga 11 dárkkistuvvon fitnodagas leat dolvon lobihemet olgoriikii plastihkkadoabbariid, čájeha Birasdirektoráhta bearráigeahčču.
Geavahuvvon plastihkat mat fieradit juohke sajis, lea šaddan birasváttisvuohtan.
– Min mielas lea duođalaš ášši go mii leat gávdnan olu dáhpáhusaid gos lea lobihemet fievrredan olgoriikii plastihkkadoabbariid. Plastihkka mii ii leat skihkalaččat meannuduvvon rusttegis, sáhttá nuoskkidit luonddu ja leat mielde nuoskideame daid riikkaid mat váldet vuostá dáid doabbariid. Sáhttá lea váralaš sihke olbmuid dearvvašvuhtii ja birrasii, lohká Birasdirektoráhta direktevra Ellen Hambro preassadieđáhusas.
Birasdirektoráhtta lea ovttasráđiid Tuolloásahusain dárkkistan 11 Norgga fitnodaga mat vuvdet olgoriikii ruonálistejuvvon plastihkkadoabbariid. Dáid sirrejuvvon plastihkkadoabbariid lea álki ođđasis atnit ja dat eai galggaše nuoskidit, eaige dain leat birasmirkkot. Dán lágan plastihkkadoabbariid ii dárbbaš ohcat Birasdirektoráhtas lobi vuovdit.
Olu dáin fitnodagain ledje plastihkkadoabbarat maid ii leat lohpi olgoriikii fievrredit. Earret eará váillui duođaštus ahte plastihkkadoabbariin eai leat mirkkot ja ahte dain sáhtii atnit ávkki. Go Birasdirektoráhtta fuomášii dán lobihuššama, de ledje juo sádden daid olgoriikkaide, nugo Eurohpái, Afrihkái ja Asiai. Lea olu ruđas sáhka jus garvá njuolggadusaid, iige meannut doabbariid albma láhkai, go plastihkka lea riikkaidgaskasaš gálvu. Birasdirektoráhtta ballá ahte maiddái organiserejuvvon kriminalitehta lea dás mielde. Birasdirektoráhtas leat njuolggadusat, bagadeapmi ja neahttasiidu.
