Stuorradiggi mearridii 100 miljon kruvnna liigejuolludeami NVE:i. Ruhta galgá geavahuvvot bargguide maiguin sáhttá jođánit eastadit dulvevahágiid, láireuđđasiid ja eanauđđasiid miehtá Norgga.
– Lea hirbmat buorre go NVE (Norgga čázádat- ja energiijadirektoráhta) sáhttá álggahit olu dehálaš sihkarastindoaimmaid miehtá riikka. Liigejuolludemiin beassat mii árabut álggahit eanet bargguid. Dasa lassin sáhttá maid virgádit olu olbmuid, juoidá mii lea dehálaš dál go mis lea dákkár hástaleaddji ruđalaš dilli koronavirusa geažil, lohká oljo- ja energiijaministtar Tina Bru NVE preassadieđáhusas.
NVE čázádat- ja energiijadirektevra Kjetil Lund lohká sii ožžot dál vejolašvuođa vuoruhit sihkkarastit eanet guovlluid servodahkii ávkin dán jagi.
